1 րոպեի ընթերցում
ԵՐԵՎԱՆ, 9 ՄԱՅԻՍԻ, ԱՐՄԵՆՊՐԵՍ: Հայաստանի հունահռոմեական ոճի ըմբշամարտի հավաքականի անդամ Կարեն Ասլանյանը հաղթեց Բուլղարիայի Օլիմպիական խաղերի համաշխարհային վարկանիշային մրցաշարում:
«Արմենպրես»-ի հաղորդմամբ` դեռևս նախօրեին Հայաստանի երկու ներկայացուցիչները 60կգ Արմեն Մելիքյանը և 67 կգ Կարեն Ասլանյանը, դուրս էին եկել եզրափակիչ` ապահովելով Տոկիոյի Օլիմպիական խաղերի ուղեգիր:
Մայիսի 9-ին կայացած եզրափակիչում Կարեն Ասլանյանի մրցակիցը հրաժարվել է գոտեմարտից վնասվածքի պատճառով: Ասլանյանը դարձել է մրցաշարի հաղթող: 60 կգ քաշում էլ Արմեն Մելիքյանը վնասվածքի պատճառով չի ներկայացել եզրափակիչ գոտեմարտին:
Հայաստանն այժմ ունի 8 օլիմպիական ուղեգրեր, որոնք նվաճել են մարմնամարզիկ Արթուր Դավթյանը, հունահռոմեական ոճի ըմբիշներ Արթուր Ալեքսանյանը, Կարապետ Չալյանը, Կարեն Ասլանյանը, Արմեն Մելիքյանը, ազատ ոճային ըմբիշներ Արսեն Հարությունյանը, Վազգեն Թևանյանը, բռնցքամարտիկ Կորյուն Սողոմոնյանը: