388.33
Ադրբեջանը պարտավոր է անհապաղ ազատ արձակել բոլոր ռազմագերիներին. Ֆրանսիայի Սենատի նախագահ
2 րոպեի ընթերցում
ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Ֆրանսիայի Հանրապետության Սենատի նախագահ Ժերար Լարշեն շեշտում է Ադրբեջանի կողմից հայ ռազմագերիների անհապաղ ազատ արձակման անհրաժեշտությունը:
«Արմենպրես»-ի հաղորդմամբ՝ այս մասին նա ասաց ՀՀ ազգային ժողովում Արարատ Միրզոյանի հետ համատեղ հայտարարությանը՝ իրենց հանդիպումից հետո:
«Մեր այս այցելությունը շարունակությունն է այն բանաձևի, որ նոյեմբերին ընդունվեց խորհրդարանում չափազանց լայն մեծամասնությամբ՝ ընդամենը 1 «դեմ» քվեարկությամբ: Սա բացառիկ մի բան է, յուրքանչյուրս կերազի, որ այսպիսի քվեարկություններ ավելի հաճախ լինեն»,- ասաց Ֆրանսիայի Սենատի նախագահը:
Նա հիշեցրեց, որբանաձևը կոչ է անում Ֆրանսիայի կառավարությանը՝ ճանաչելու ԼՂ անկախությունը՝ հավելելով, որ միևնույն ժամանակ բանաձևը նշում է, որ այդ ճանաչումը կհանդիսանա գործիք՝ խաղաղ բանակցությունների միջոցով հասնելու տևական և կայուն խաղաղության:
Արարատ Միրզոյանի գլխավորությամբ ՀՀ ԱԺ պատգամավորների հետ ֆրանսիական պատվիրակության անդամները քննարկել են նաև հայ ռազմագերիների հարցը:
«Հստակ լինենք՝ Ադրբեջանը պարտավոր է անհապաղ ազատ արձակել բոլոր ռազմագերիներին` համաձայն ստորագրած համաձայնագրի և բոլոր միջազգային պայմանագրերի»,- ասաց Ժերար Լարշեն:
Ֆրանսիայի Սենատի նախագահը հիշեցրեց, որ այս շաբաթ ԵԽԽՎ նիստում քննարկվել է ռազմագերիների հարցը, և Ֆրանսիայի Սենատի անդամներից մեկը Սենատի անունից հանդես է եկել և ներկայացրել այդ պահանջները` անհապաղ ազատ արձակման վերաբերյալ:
Ֆրանսիայի Հանրապետության Սենատը 2020-ի նոյեմբերի 20-ին ընդունել էր«Լեռնային Ղարաբաղի Հանրապետության ճանաչման անհրաժեշտության մասին»բանաձևի նախագիծը:
