Օլիմպիադայի հանրապետական փուլում հաղթող ճանաչված գեղարքունիքցի դպրոցականներին շնորհվեցին դիպլոմներ և գովասանագրեր
1 րոպեի ընթերցում
![Օլիմպիադայի հանրապետական փուլում հաղթող ճանաչված գեղարքունիքցի դպրոցականներին շնորհվեցին դիպլոմներ և գովասանագրեր](http://armenpress.am/resized/480/static/news/b/2021/04/1050186.jpg)
ԳԱՎԱՌ, 24 ԱՊՐԻԼԻ, ԱՐՄԵՆՊՐԵՍ։ Գեղարքունիքի մարզպետարանում մարզպետ Գնել Սանոսյանը 2021 թվականի դպրոցականների առարկայական օլիմպիադայի հանրապետական փուլում հաղթած օլիմպիականներին հանձնել է ՀՀ ԿԳՄՍ նախարարության կողմից շնորհված առաջին, երկրորդ, երրորդ կարգի դիպլոմները և գովասանագրերը:
Ինչպես «Արմենպրես»-ին տեղեկացրին Գեղարքունիքի մարզպետարանի կրթության, մշակույթի եւ սպորտի վարչությունից, օլիմպիադայի հանրապետական փուլին Գեղարքունիքի մարզից մասնակցել են 71 աշակերտ, որոնցից բնագիտական 7 առարկաների գծով՝ 18, իսկ հումանիտար 9 առարկաների գծով՝ 53 աշակերտ: Հանրապետական փուլին մասնակցած աշակերտներից 19-ը ստացել են դիպլոմներ, 9-ը` գովասանագրեր:
Գրանցած հաջողությունների համար Գեղարքունիքի մարզպետ Գնել Սանոսյանը շնորհավորել է դպրոցականներին, նրանց, դպրոցների տնօրեններին, ուսուցիչներին եւ ծնողներին՝ մաղթելով նրանց նորանոր հաջողություններ:
Խոսրով Խլղաթյան