398.74
Գնելու ենք լավագույն զենքերը. Արմեն Գրիգորյանն անդրադարձել է Զինված ուժերի բարեփոխումներին
2 րոպեի ընթերցում
ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ: Հայաստանի Հանրապետության Անվտանգության խորհրդի քարտուղար Արմեն Գրիգորյանը հայտնել է, որ Հայաստանը պատրաստվում է գնել լավագույն զենքերը՝ հավելելով, որ գնումները կատարվելու են այդ բնագավառում առաջատար երկրից: «Արմենպրես»-ի փոխանցմամբ` այս մասին Գրիգորյանը նշել է ՌԻԱ Նովոստիին տված հարցազրույցում:
«Սպառազինության վերաբերյալ կնշեմ, որ գնելու ենք լավագույն զենքերը, և Ձեզ հայտնի է, թե որ երկիրն է այդ բնագավառում առաջատարը։ Միաժամանակ, մենք պլանավորում ենք հետագայում ակտիվորեն զարգացնել Հայաստանի ռազմաարդյունաբերական համալիրը»,- նշել է Գրիգորյանը:
Անդրադառնալով Զինված ուժերում իրականացվելիք բարեփոխումներին, Արմեն Գրիգորյանը վերահաստատել է, որ դրանք իրականացվելու են Ռուսաստանի աջակցությամբ:
«Մենք արդեն հայտարարել ենք, որ Հայաստանի զինված ուժերի բարեփոխումները իրականացվելու են Ռուսաստանի աջակցությամբ։ Մեր տեսանկյունից, Ռուսաստանի Զինված ուժերի վերջին տասներկու տարիների բարեփոխումներն ամենահաջողվածներից են: Բանակի արդիականացումը և օպտիմալացումը, արդյունավետության բարձրացումը, ավտոմատացված կառավարման համակարգի ներդրումը, ժամանակակից սպառազինությունը նպաստել են, որպեսզի Ռուսաստանը շարունակի ունենալ աշխարհի ամենաուժեղ բանակներից մեկը։ Մենք համոզված ենք, որ Ռուսաստանի օգնությամբ կանցնենք այդ ճանապարհն ու կկառուցենք հզոր հայկական բանակ»,- հայտնել է ԱԽ քարտուղարը:
Բաժանորդագրվեք մեր ալիքին Telegram-ում