2 րոպեի ընթերցում
ԵՐԵՎԱՆ, 9 ԱՊՐԻԼԻ, ԱՐՄԵՆՊՐԵՍ: Իվետա Մուկուչյանը, որն ապրիլի 7-ին երկրպագուներին տոն նվիրեց մենահամերգով՝ կատարելով հին ու նոր երգեր, շարունակում է հանդես գալ նորություններով:
«Արմենպրես»-ի հաղորդմամբ՝ Մուկուչյանը ներկայացրել է «Մեծ հայկական հարսանիք» երգի տեսահոլովակը, որի ռեժիսորն Արթուր Մանուկյանն է:
Երգի երաժշտությունը գրել են Տիգրան Սուչյանն ու Արման Փահլեվանյանը, խոսքերի հեղինակն Ավետ Բարսեղյանն է:
Գերմանահայ երգչուհի, երգահան, մոդել և դերասանուհի Իվետա Մուկուչյանը ծնվել է Երևանում, սակայն 5 տարեկանում տեղափոխվել է Համբուրգ: 2009-ին վերադարձել է Հայաստան և մասնակցել «Հայ սուպերսթար» հեռուստանախագծի չորրորդ եթերաշրջանին՝ զբաղեցնելով 5-րդ հորիզոնականը։ 2012 թվականին մասնակցել է «Գերմանիայի ձայնը» նախագծի երկրորդ եթերաշրջանին։ Նույն տարում «El Style» ամսագիրը նրան ճանաչել է «Ամենացանկալի հայուհի»։
2016 թվականի մայիսին «Սիրո ալիք» երգով ներկայացրել է Հայաստանը «Եվրատեսիլ» երգի միջազգային մրցույթում և գրավել 7-րդ տեղը:
Երաժշտասերների լայն շրջանակին հայտնի են Մուկուչյանի «Իմ անուշ Հայաստան», «Ամենա», «Հայաստան ջան», «Անհասանելի» և մի շարք այլ ստեղծագործություններ: