Սպուտնիկ V-ով պատվաստված անձանց մոտ արտառոց և անսպասելի դեպքեր չեն արձանագրվել. մասնագետ
3 րոպեի ընթերցում
ԵՐԵՎԱՆ, 2 ԱՊՐԻԼԻ, ԱՐՄԵՆՊՐԵՍ: Հայաստանի Հանրապետությունում Սպուտնիկ V-ով պատվաստված շուրջ 600 քաղաքացու մոտ հետպատվաստումային որևէ խնդիր չի առաջացել:
«Արմենպրես»-ի հաղորդմամբ՝ այս մասին մամուլի ասուլիսի ժամանակ ասաց ՀՀ ԱՆ հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը:
«Հայաստանն օրերս ձեռք է բերել AstraZeneca պատվաստանյութի առաջին խմբաքանակը՝ 24 հազար դեղաչափ, սակայն մինչ այդ մենք ունեինք Սպուտնիկ V պատվաստանյութը: Այդ ժամանակ մեկնարկել էինք պատվաստումները բուժաշխատողների, ինչպես նաև ռիսկի մյուս խմբերի շրջանում, ովքեր հերթագրվել էին մինչ պատվաստանյութը ՀՀ ներմուծելը: Սպուտնիկ V-ով պատվաստված շուրջ 600 քաղաքացու մոտ հետպատվաստումային որևէ խնդիր չկա, արտառոց և անսպասելի դեպքեր չեն արձանագրվել»,- նշեց Աբովյանը:
Նրա խոսքով՝ ներկայում, AstraZeneca-ի ձեռքբերումից հետո, աշխատանքներ են տարվում դրա բաշխման ուղղությամբ:
«Մոտակա ամիսներին մենք սպասում ենք AstraZeneca-ի մյուս չափաբաժինը, ինչպես նաև կարող են լինել այլ պատվաստանյութեր: Այն, ինչ մեզ կառաջարկվի, կքննարկվի ՀՀ առոջապահության նախարարության կողմից»,- ընդգծեց մասնագետը:
Հայաստանում կորոնավիրուսի դեմ պայքարին միացած բուժկենտրոնների բուժաշխատողների շրջանում կամավորության սկզբունքով կորոնավիրուսի դեմ պատվաստում է իրականացվել Ռուսաստանի նվիրած Սպուտնիկ-V պատվաստանյութերով: Հայաստանը Ռուսաստանի հետ երկկողմ աշխատանքների արդյունքում նախատեսում է առաջիկայում գնել Սպուտնիկ-V պատվաստանյութը:
Միևնույն ժամանակ Հայաստանի Հանրապետություն է ներկրվել կորոնավիրուսային հիվանդության (COVID-19) դեմ պատվաստանյութի՝ «COVAX FACILITY» նախաձեռնության միջոցով առաջին խմբաքանակը՝ 24 հազար դեղաչափ: Այն նախատեսված է ռիսկի խմբերի շրջանում, մասնավորապես՝ բուժաշխատողների, 65 տարեկան և բարձր տարիքի անձանց, քրոնիկ հիվանդների, տարեցների խնամքի կենտրոնների բնակիչների և աշխատակիցների, սոցիալական խնամքի կենտրոնների աշխատակիցների, կամավորության սկզբունքով, կորոնավիրուսային հիվանդության (COVID-19) դեմ պատվաստելու համար: «AstraZeneca» պատվաստանյութն ունի Առողջապահության համաշխարհային կազմակերպության (ԱՀԿ) կողմից արտակարգ իրավիճակներում կիրառման թույլտվություն: Այն կիրառելի է 18 տարեկան և բարձր տարիքի անձանց համար:
Ամերիկյան FDA-ը, Եվրամիության դեղերի գրանցման գործակալությունը և ԱՀԿ-ն տվել են իրենց եզրակացությունները այս պատվաստանյութի վերաբերյալ: Գրանցված կողմնակի ազդեցությունների ու պատվաստման միջև պատճառահետևանքային կապ չի հայտնաբերվել: Առաջիկայում պատվաստանյութը հասանելի կլինի թե Երևանում, թե ՀՀ մարզերում: