368.59
Արմեն Սարգսյանը շնորհավորել է Աբու Դաբիի Էմիրության թագաժառանգ, շեյխ Մուհամմադ Բին Զայեդ Ալ Նահյանին՝ ծննդյան 60-ամյակի առթիվ
2 րոպեի ընթերցում
ԵՐԵՎԱՆ, 12 ՄԱՐՏԻ, ԱՐՄԵՆՊՐԵՍ: Հայաստանի Հանրապետության նախագահ Արմեն Սարգսյանը շնորհավորական ուղերձ է հղել ԱՄԷ Աբու Դաբիի էմիրության թագաժառանգ, ԱՄԷ Զինված ուժերի գերագույն հրամանատարի տեղակալ, շեյխ Մուհամմադ Բին Զայեդ Ալ Նահյանին՝ ծննդյան 60-րդ տարեդարձի առթիվ: «Արմենպրես»-ին այս մասին հայտնեցին ՀՀ նախագահի աշխատակազմի հասարակայնության հետ կապերի վարչությունից:
Նախագահ Սարգսյանի ուղերձում մասնավորապես ասվում է.«Վերջին տարիներին հայ-էմիրաթական փոխհարաբերությունները թևակոխել են զարգացման նոր փուլ, որտեղ մեծ է Ձեր դերակատարությունը: Մեր երկրներն արդյունավետ համագործակցություն են ծավալում այնպիսի ոլորտներում, ինչպիսիք են ռազմարդյունաբերությունը, սննդի անվտանգությունը, տեղեկատվական տեխնոլոգիաները, վերականգնվող էներգիան:
Մեծ է նաև Ձեր անձնական ներդրումը և առաջնորդությունը տարածաշրջանային անվտանգության և կայունության գործում: Հատուկ կարևորում եմ մեր միջև հաստատված բարեկամական հարաբերությունները: Հատկապես ջերմությամբ եմ հիշում մեր հանդիպումներն ու մտերմիկ զրույցները, որոնք ավելի են ամրապնդում փոխադարձ վստահությունն ու առավել խորացնում մեր ժողովուրդների բարեկամությունն ու միջպետական համագործակցությունը: Լիահույս եմ, որ մոտ ապագայում պատիվ կունենամ Ձեզ հյուրընկալելու Հայաստանում»:
Նախագահ Սարգսյանը քաջառողջություն և հաջողություններ է մաղթել շեյխ Մուհամմադ Բին Զայեդ Ալ Նահյանին:
Բաժանորդագրվեք մեր ալիքին Telegram-ում