1 րոպեի ընթերցում
ԵՐԵՎԱՆ, 20 ՀՈՒՆՎԱՐԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանը միանշանակ դրական է համարում Լեռնային Ղարաբաղում ռուս խաղաղապահների ներկայությունը: «Արմենպրես»-ի փոխանցմամբ՝ այս մասին Փաշինյանն ասաց Ազգային ժողովում կառավարության հետ հարցուպատասխանի ընթացքում, պատասխանելով անկախ պատգամավոր Արման Բաբաջանյանի հարցին:
«Հայաստանի Հանրապետությանը և Արցախի Հանրապետության անվտանգային հարաբերություններում ոչինչի չի փոխվել, բայց ակնհայտորեն ավելացել է նոր գործոն, որը ռուս խաղաղապահների ներկայությունն է Արցախում: Արդյոք դրական է ռուս խաղաղապահների ներկայությունն Արցախում, թե՞ բացասական: Միանշանակ դրական է: Այդ ներկայությունը կոնկրետ անվտանգային խնդիրներ լուծելու համար է»,- ասաց Փաշինյանը:
Ռուսաստանի Դաշնության նախագահի 2020 թվականի նոյեմբերի 10-ի հրամանագրով Լեռնային Ղարաբաղում տեղակայվել է ռուս խաղաղապահների զորակազմը: Զորակազմի հիմքը կազմում է Կենտրոնական ռազմական օկրուգի 15-րդ առանձին մոտոհրաձգային բրիգադը։ Խաղաղապահների հրամանատարն է գեներալ-լեյտենանտ Ռուստամ Մուրադովը։
