Պատրաստ ենք սկսել ԵԱՀԿ Մինսկի խմբի համանախագահության ձևաչափով բանակցությունները. Այվազյան
1 րոպեի ընթերցում
ԵՐԵՎԱՆ, 20 ՀՈՒՆՎԱՐԻ, ԱՐՄԵՆՊՐԵՍ: Հայաստանի Արտաքին գործերի նախարար Արա Այվազյանը վերահաստատեց հայկական կողմի պատրաստակամությունը՝ վերսկսել Լեռնային Ղարաբաղի հարցի շուրջ բանակցությունները՝ ԵԱՀԿ Մինսկի խմբի համանախագահության ձևաչափով: «Արմենպրես»-ի փոխանցմամբ՝ այս մասին Այվազյանն ասաց Ազգային ժողովում կառավարության հետ հարցուպատասխանի ընթացքում, պատասխանելով «Իմ քայլը» խմբակցության անդամ Տաթևիկ Հայրապետյանի հարցին:
«Հայկական կողմը պատրաստ է սկսել բանակցությունները ԵԱՀԿ Մինսկի խմբի համանախագահության ձևաչափով և վարել բանակցություններն այն հիմնարար սկզբունքների շուրջ, որոնց վերաբերյալ նախկինում էլ ձեռք է բերվել պայմանավորվածություն»,- ասաց Այվազյանը:
Նախարարը նշեց, որ հայկական կողմի համար առաջնային հարցեր են ապաշրջափակումը, հայ բնակչության անվտանգ վերադարձն իրենց բնակավայրերը, հումանիտար աջակցության ապահովումն Արցախին ու հայկական կրոնական և մշակութային ժառանգության պահպանումը: