«Ապրելու ենք, որ հաղթենք». նվիրատվություն զինծառայողների ապահովագրության հիմնադրամին

ԵՐԵՎԱՆ, 22 ԴԵԿՏԵՄԲԵՐՉԻ, ԱՐՄԵՆՊՐԵՍ: «Հայփոստ» ընկերությունը դեկտեմբերի 22-ին «Ապրելու ենք, որ հաղթենք» խորագրի ներքո մարել և շրջանառության մեջ է դրել նամականիշերի և բացիկների շարք: «Արմենպրես»-ին այս մասին հայտնեցին «Հայփոստ» ՓԲԸ-ից:

Մարումն իրականացրել են «Հայփոստ» ՓԲԸ գլխավոր տնօրեն Հայկ Կարապետյանը, Զինծառայողների ապահովագրության հիմնադրամի տնօրեն Վարուժան Ավետիքյանը և Հայաստանի ֆիլատելիստների միության նախագահ Հովիկ Մուսայելյանը:

Հայփոստի գլխավոր տնօրեն Հայկ Կարապետյանը նշել է. «Այսօր մեր բոլորի կարևորագույն անելիքներից մեկը զինծառայողներին և նրանց ընտանիքներին սատարելն է: Հայփոստը պատերազմական օրերին իր հնարավորությունների առավելագույն չափով եղել է բանակի կողքին: Այսօր ևս Զինծառայողների ապահովագրության հիմնադրամի հետ համատեղ իրականացնում ենք երկու կարևոր նախագիծ, որոնց խորագիրն է «Ապրելու ենք, որ հաղթենք»: Սա Զինծառայողների ապահովագրության հիմնադրամի հետ Հայփոստի առաջին նախագիծը չէ: Նախկինում Հայփոստը թողարկել է նվիրատվության կտրոնով նամականիշեր, որի արդյունքում գոյացած բավական պատկառելի գումար է փոխանցվել հիմնադրամին»:

Զինծառայողների ապահովագրության հիմնադրամի տնօրեն Վարուժան Ավետիքյանը և Հայաստանի ֆիլատելիստների միության նախագահ Հովիկ Մուսայելյանն իրենց ելույթներում ընդգծել են նման նախաձեռնությունների առանձնահատուկ կարևորությունն այսօր:

Բացիկ գնելով զինծառայողների համար նվիրատվություն անելը առավել քան դյուրին է, բավական է միայն այցելել https://postcards.stamps.am/ կայքէջը: Ձեր նվիրաբերած գումարն ամբողջությամբ կփոխանցվի հիմնադրամին, իսկ Հայփոստը նշված փոստային հասցեով կառաքի Ձեր ընտրած բացիկը՝ որպես հիշատակ Ձեր կատարած նվիրաբերության մասին: Հասցեական առաքումն իրականացվում է անվճար. Երևանում՝ 1, իսկ մարզերում՝ 2-3 աշխատանքային օրում։ Արտասահմանում առաքումն իրականացվում է 14-30 օրում:

Ինչպես օգնել զինծառայողներին և նրանց ընտանիքներին՝ պատվիրելով բացիկ

* postcards.stamps.am կայքում ընտրում եք առաջարկվող 8 թեմատիկ բացիկներից մեկը

* գումարի սանդղակի միջոցով նշում եք այն գումարը, որը պատրաստ եք վճարել բացիկի համար (նվազագույն գումարը 500 դրամ է) և սեղմում «Նվիրաբերիր» կոճակը

* Կայքում վճարումն իրականացվում է ցանկացած բանկային քարտով։

* Բացիկը ծրարավորվելու և ուղարկվելու է «Պատվիրված» կարգավիճակով՝ ունենալով հետևման կոդ։

* Փոստային բաժանմունք և հասցեական առաքումն իրականացվում է անվճար։

* Ծրարավորված բացիկը փոստատարի կողմից առաքվելու է ըստ հասցեի։

* Հայաստանում առաքումն իրականացվում է Երևանում՝ 1, իսկ մարզերում՝ 2-3 աշխատանքային օրում։ Արտասահմանում առաքումն իրականացվում է 14-30 օրում։

* Նվիրաբերվող գումարներից գոյացած հասույթը փոխանցվում է Զինծառայողների ապահովագրության հիմնադրամ։

Բացիկներին պատկերված են Մեսրոպ Մաշտոցի, Սասունցի Դավթի, Մարտիրոս Սարյանի, Առնո Բաբաջանյանի, Կոմիտասի, Լեոնիդ Ենգիբարյանի արձանները և «Լեռնային պար»արձանախումբը՝ Արցախի բնության խորապատկերներին, Արցախի«Արիության համար» մեդալով հետմահու պարգևատրված զինվոր Ալբերտ Հովհաննիսյանը՝ մարտական գործողության ընթացքում: Բացիկներն ըստ թեմատիկայի ունեն խորագրեր. «#ՍՏԵՂԾԵԼՈՒ ԵՆՔ», «#ՀԱՂԹԵԼՈՒ ԵՆՔ», «#ՊԱՐԵԼՈՒ ԵՆՔ», «#ՆԿԱՐԵԼՈՒ ԵՆՔ», «#ՆՎԱԳԵԼՈՒ ԵՆՔ», «#ԵՐԳԵԼՈՒ ԵՆՔ» , «#ԺՊՏԱԼՈՒ ԵՆՔ»: Բոլոր բացիկների ներքևի հատվածում «ԱՆՈՒՆՍ ԱՐՑԱԽ Է» և «ՀԱՂԹԵԼՈՒ ԵՆՔ» կարգախոսերն են՝ հայերեն և անգլերեն լեզուներով:

Բացիկների դիզայնը՝ Ռեմ Սահակյանի

Տպարանը` «ԼԵՎԵԼ ՊՐԻՆՏ»

Չափսերը` 110,0 x 150,0 մմ

Ալբերտ Հովհաննիսյանի լուսանկարի հեղինակը Սիփան Գյուլումյանն է:

Յոթ նոր նամականիշ՝ նվիրված «Զինծառայողների ապահովագրության հիմնադրամ» թեմային

2020 թվականի դեկտեմբերի 22-ին մարվում և շրջանառության մեջ են դրվում յոթ նամականիշ՝ նվիրված «Զինծառայողների ապահովագրության հիմնադրամ» թեմային:

Փոստային նամականիշերն ունեն 120, 220, 230, 280, 330, 380 և 500 ՀՀ դրամ անվանական արժեքներ: Նամականիշերը տպագրված են Ֆրանսիայի “Cartor” տպագրատանը՝ յուրաքանչյուրը 10 000 տպաքանակով: Նամականիշերի հեղինակներն են՝ «Դոմինո Պրոդակշն» ՍՊԸ-ն և դիզայներ Ռեմ Սահակյանը:

Փոստային նամականիշերի հետ մեկտեղ «ՀայՓոստ» ՓԲԸ-ն թողարկել է 500 ՀՀ դրամ արժողությամբ նվիրատվության կտրոններ, որոնց վաճառքից գոյացած հասույթը կուղղվի «Զինծառայողների ապահովագրության հիմնադրամ»-ի միջոցով իրականացվող նախագծերին:

120 ՀՀ դրամ անվանական արժեքով նամականիշի վրա պատկերված է «Սասնա ծռեր»հայ ազգային էպոսի հերոս Սասունցի Դավթի արձանը՝ արցախյան բնության խորապատկերին: Նամականիշի վերևի հատվածում «#ՀԱՂԹԵԼՈՒ ԵՆՔ» գրառումն է՝ հայերեն լեզվով:

220 ՀՀ դրամ անվանական արժեքով նամականիշի վրա պատկերված է «Լեռնային պար»արձանախումբը՝ արցախյան բնության խորապատկերին: Նամականիշի վերևի հատվածում նշված է «#ՊԱՐԵԼՈՒ ԵՆՔ» գրառումը՝ հայերեն լեզվով:

230 ՀՀ դրամ անվանական արժեքով նամականիշի վրա պատկերված է կրկեսի հայ մեծանուն արտիստ, ծաղրածու Լեոնիդ Ենգիբարյանի հուշարձանը՝ արցախյան բնության խորապատկերին: Նամականիշի վերևի հատվածումնշված է «#ԺՊՏԱԼՈՒ ԵՆՔ» գրառումը՝ հայերեն լեզվով:

280 ՀՀ դրամ անվանական արժեքով նամականիշի վրա պատկերված է հայ վարդապետ, երգահան և երգիչ Կոմիտասի հուշարձանը՝ Դադիվանքի և արցախյան բնության խորապատկերին: Նամականիշի վերևի հատվածում նշված է «#ԵՐԳԵԼՈՒ ԵՆՔ» գրառումը՝ հայերեն լեզվով:

330 ՀՀ դրամ անվանական արժեքով նամականիշի վրա պատկերված է հայ ականավոր նկարիչ Մարտիրոս Սարյանի արձանը՝ արցախյան բնության խորապատկերին: Նամականիշի վերևի հատվածում նշված է «#ՆԿԱՐԵԼՈՒ ԵՆՔ» գրառումը՝ հայերեն լեզվով:

380 ՀՀ դրամ անվանական արժեքով նամականիշի վրա պատկերված է հայ նշանավոր կոմպոզիտոր Առնո Բաբաջանյանի արձանը՝ արցախյան բնության խորապատկերին: Նամականիշի վերևի հատվածում նշված է «#ՆՎԱԳԵԼՈՒ ԵՆՔ» գրառումը՝ հայերեն լեզվով:

500 ՀՀ դրամ անվանական արժեքով նամականիշի վրա պատկերված է հայոց գրերի ստեղծող Մեսրոպ Մաշտոցի հուշարձանը՝ արցախյան բնության խորապատկերին: Նամականիշի վերևի հատվածում նշված է «#ՍՏԵՂԾԵԼՈՒ ԵՆՔ» գրառումը՝ հայերեն լեզվով:

Յոթ նամականիշով մանրաթերթի հետ մեկտեղ «ՀայՓոստ» ՓԲԸ-ն թողարկել է 5000 ՀՀ դրամ արժողությամբ նվիրատվության կտրոն, որտեղ պատկերված է Արցախի«Արիության համար» մեդալով հետմահու պարգևատրված զինվոր Ալբերտ Հովհաննիսյանը՝ մարտական գործողության ընթացքում: Կտրոնի ձախ հատվածում «ԱՆՈՒՆՍ ԱՐՑԱԽ Է» և «ՀԱՂԹԵԼՈՒ ԵՆՔ» կարգախոսերն են՝ հայերեն և անգլերեն լեզուներով:

Յոթ նամականիշի տեխնիկական տվյալներն են.

Թողարկման օրը` 22 դեկտեմբերի 2020թ.

Դիզայնը՝ «Դոմինո Պրոդակշն» ՍՊԸ-ի, Ռեմ Սահակյանի

Տպարանը` Cartor, Ֆրանսիա

Չափսերը` 30,0 x 40,0 մմ

Մեկ թերթի վրա՝10 հ.

Տպաքանակը՝ 10 000 հ.x 7

Յոթ նամականիշով մանրաթերթի տեխնիկական տվյալներն են.

Թողարկման օրը`22 դեկտեմբերի 2020թ.

Լուսանկարը՝Սիփան Գյուլումյանի

Դիզայնը՝ «Դոմինո Պրոդակշն» ՍՊԸ-ի, Ռեմ Սահակյանի

Տպարանը`Cartor, Ֆրանսիա

Նամականիշի չափսերը՝30,0 x 40,0 մմ

Մանրաթերթի չափսերը`115,0 x 230,0 մմ

Տպաքանակը՝10 000 հ.