Չկա պատերազմից տուժած և պատշաճ բուժօգնություն չստացած քաղաքացի կամ զինծառայող. Թորոսյան

ԵՐԵՎԱՆ, 9 ՆՈՅԵՄԲԵՐԻ, ԱՐՄԵՆՊՐԵՍ: Արցախի նկատմամբ Ադրբեջանի սանձազերծած լայնածավալ պատերազմի և մարտական գործողությունների արդյունքում հայկական կողմից տուժած բոլոր քաղաքացիներն ու զինծառայողները ստացել են պատշաճ բուժօգնություն: «Արմենպրես»-ի փոխանցմամբ` այս մասին նոյեմբերի 9-ին ՀՀ ազգային ժողովի մշտական հանձնաժողովների համատեղ նիստի ընթացքում ասաց Առողջապահության նախարար Արսեն Թորոսյանը:

«Ռազմական գործողություններից տուժած քաղաքացիների, զինծառայողների, քաղաքացիական անձանց մասով որևէ թերացում չկա՝ չնայած նրան, որ առողջապահական համակարգն աշխատում է գերլարված ու գերմոբիլիզացված: Չկա գեթ մեկ զինծառայող կամ քաղաքացիական անձ, որն ունեցել է վիրավորում կամ այլ վնասվածք ռազմական գործողությունների արդյունքում և չի ստացել պատշաճ բուժօգնություն: Այդ մասով մենք 100%-ով ծածկում ենք դաշտը, ունենք նաև ռեզերվներ այլ զարգացումների համար»,- ասաց Թորոսյանը:

Արցախի դեմ Ադրբեջանի սանձազերծած ռազմական գործողությունների ընթացքում երեք անգամ` հոկտեմբերի 10-ին Ռուսաստանի, հոկտեմբերի 18-ին Ֆրանսիայի, հոկտեմբերի 26-ին ԱՄՆ-ի միջնորդությամբ հայտարարվել է հրադադարի մասին, սակայն պայմանավորվածություններն ուժի մեջ մտնելուց րոպեներ անց Ադրբեջանը խախտել է դրանք, ձեռնարկել դիվերսիոն գրոհներ, հրետակոծել առաջնագիծն ու խաղաղ բնակավայրերը։

Նորայր Շողիկյան