2 րոպեի ընթերցում
ԵՐԵՎԱՆ, 31 ՀՈԿՏԵՄԲԵՐԻ, ԱՐՄԵՆՊՐԵՍ։ Կյանքից հեռացել է վաստակաշատ ուսուցիչ, ֆիզիկոս Էյլեր Յուզբաշյանը: Այս մասին հաղորդեցին ԵՊՀ-ին առընթեր Արտաշես Շահինյանի անվան Ֆիզմաթ դպրոցից։
Էյլեր Յուզբաշյանը (Մարգարյան) ծնվել է 1942 թ. փետրվարի 22-ին Արցախի Հանրապետության Մարտակերտի շրջանի Չլդրան գյուղում: Յուզբաշյանը դպրոցն ավարտել է ոսկե մեդալով և ընդունվել Երևանի Պետական համալսարանի (ԵՊՀ-ի) ֆիզիկայի ֆակուլտետը: 1964թ. համալսարանն ավարտել է գերազանց գնահատականներով: Այնուհետև սովորել է Մոսկվայի Ստեկլովի անվան գիտահետազոտական ինստիտուտի ասպիրանտուրայում: 1972թ. նա աշխատանքի է անցնում ԵՊՀ-ի ֆիզիկայի ֆակուլտետում որպես դոցենտ: 1989թ. պաշտպանել է ֆիզմաթ գիտությունների թեկնածուական թեզը և ստացել ֆիզմաթ գիտությունների թեկնածուի աստիճանը: Այնուհետև դասախոսել է Երևանի պոլիտեխնիկական ինստիտուտում, իսկ 1991 թվականից անմնացորդ աշխատել ԵՊՀ-ին առընթեր Արտաշես Շահինյանի անվան Ֆիզմաթ դպրոցում: Նրա նախաձեռնությանբ 1993 թ.-ից մինչև 2017 թ. դպրոցում հիմնվել ու գործում էր ֆիզիկայի ուսուցիչների գիտաժողովը: Է. Յուզբաշյանի թե՛ ընդունակություններն են էղել փայլուն, թե՛ գիտելիքները, ու նա, անշուշտ, ի վիճակի էր իր կյանքն ամբղջությամբ նվիրելու գիտական պրպտումին ու դառնալու համաշխարհային անունով գիտնական, բայց, ինչպես ասում, «մարդը ծրագրում է, Աստված` իրագործում», ու Յուզբաշյանը իր կյանքի հիմնական մասը նվիրում է մատաղ սերնդի կրթությանն ու գիտամանկավարժական աշխատանքին:
Է. Յուզբաշյանն ավելի քան 100 գիտական, գիտամեթոդական հոդվածների, ֆիզիկայի խնդրագրքերի և ուսումնական ձեռնարկների հեղինակ է: Նա խմբագրել է մի քանի տասնյակ գրքեր: Է.Յուզբաշյանը մատաղ սերնդի կրթության և դաստիարակության գործում կատարած աշխատանքների համար ծննդյան 70-ամյակի կապակցությամբ պարգևատրվել է ՀՀ կրթության և գիտության նախարարության ոսկե մեդալով: