1 րոպեի ընթերցում
ՍՏԵՓԱՆԱԿԵՐՏ, 31 ՀՈԿՏԵՄԲԵՐԻ, ԱՐՄԵՆՊՐԵՍ: Ադրբեջանի կողմից հոկտեմբերի 31-ի առավոտվանից Արցախի քաղաքացիական բնակավայրերը թիրախավորելու ժամանակ հրետակոծության է ենթարկվել Մարտունու շրջանի Հերհեր գյուղը:
«Արմենպրես»-ին այս մասին տեղեկացնում են Արցախի մարդու իրավունքների պաշտպանի գրասենյակից:
«ԵԱՀԿ Մինսկի խմբի համանախագահների միջնորդությամբ երեկ կայացած հանդիպումից և հումանիտար հարցերի շուրջ ձեռք բերված համաձայնությունից հետո Ադրբեջանը հոկտեմբերի 31-ի առավոտվանից շարունակել է թիրախավորել Արցախի քաղաքացիական բնակավայրերը: Հերհեր գյուղի հրետակոծության հետևանքով իր տանը զոհվել է մեկ քաղաքացիական անձ՝ 59-ամյա Ապրես Ադամյանը»,- հայտնում են Արցախի ՄԻՊ-ից:
Առավոտյան հրթիռակոծվել են մայրաքաղաք Ստեփանակերտի բնակելի թաղամասերը և կենտրոնական շուկան, որտեղ որևէ ռազմական նշանակության օբյեկտ տեղակայված չէ: Հրթիռային հարվածների հետևանքով քաղաքին հասցվել է նյութական մեծ վնաս: Հրթիռահրետանային հարվածներ են հասցվել նաև Մարտունի, Մարտակերտ և Շուշի քաղաքներին:
Տուժածների և նյութական վնասի վերաբերյալ տվյալները ԱՀ ՄԻՊ-ի գրասենյակը ճշտում է: