Սիրիայի հյուսիս-արևմուտքում ավիահարվածներ են հասցվել Թուրքիայի կողմից աջակցվող գրոհայինների ճամբարին

ԵՐԵՎԱՆ, 26 ՀՈԿՏԵՄԲԵՐԻ, ԱՐՄԵՆՊՐԵՍ: Սիրիայի հյուսիս-արևմուտքում գտնվող Իդլիբ նահանգում ավիահարվածներ են հասցվել Թուրքիայի կողմից աջակցվող գրոհայինների ճամբարին, որի հետևանքով 50 գրոհային սպանվել է, գրեթե նույնքանն էլ ստացել են տարբեր աստիճանի վնասվածքներ: «Արմենպրես»-ի փոխանցմամբ, ինչպես հայտնում է ABC News-ը, այս մասին նշել է պրոթուրքական «Ջաբաթ Վաթանիա Թահրիր» խմբավորման ներկայացուցիչ Նաջի Մուստաֆան, ով ավիահարվածի մեջ մեղադրել է Ռուսաստանին:

«Մենք կպատասխանենք այս հարվածներին»,- ասել է Մուստաֆան՝ սպառնալով գրոհել ռուսական կառավարական շենքերն ու դիրքերը:

Նշվում է, որ ավիահարվածից սպանվածների թվում են նաև գրոհայինների խմբավորման ղեկավարները: Գրոհայինների ճամբարը գտնվում է Թուրքիայի հետ սահմանից ոչ հեռու:

Կան հաստատված տեղեկություններ, որ սեպտեմբերի 27-ից Արցախի նկատմամբ Ադրբեջանի սանձազերծած և Թուրքիայի կողմից աջակցվող պատերազմում հայկական կողմի դեմ կռվում են նաև Սիրիայից ու Լիբիայից Ադրբեջան բերված ահաբեկիչներ, որոնք ահաբեկչական խմբավորումների ճամբարներում պատրաստվում և առաջնագիծ են ուղարկվում Թուրքիայի միջոցներով: