Վլադիմիր Գասպարյանը խոչընդոտել է «Ազատության» լրագրողների աշխատանքը
1 րոպեի ընթերցում
![Վլադիմիր Գասպարյանը խոչընդոտել է «Ազատության» լրագրողների աշխատանքը](http://armenpress.am/resized/480/static/news/b/2020/08/1024484.jpg)
ԵՐԵՎԱՆ, 9 ՕԳՈՍՏՈՍԻ, ԱՐՄԵՆՊՐԵՍ: Սևանա լճի ափամերձ հատվածներում տեղակայված ապօրինի առանձնատների ու այլ կառույցների վերաբերյալ ռեպորտաժ պատրաստելիս օգոստոսի 8-ին «Ազատություն» ռադիոկայանի լրագրողների աշխատանքը խոչընդոտել է Հայաստանի նախկին ոստիկանապետ Վլադիմիր Գասպարյանը։ «Արմենպրես»-ի հաղորդմամբ՝ այս մասին տեղեկացնում է «Ազատություն» ռադիոկայանի կայքը։
«Վերջինս վարել է տրանսպորտային միջոցը լրագրողների ուղղությամբ՝ սպառնալով վրաերթի ենթարկել ու ֆիզիկապես ոչնչացնել նրանց՝ «գյուլլել», «սատկացնել», ինչպես նաև հայհոյանքներով պահանջել իր առանձնատունը ցույց չտալ»,- ասվում է հաղորդագրության մեջ։
«Ազատությունն» իր աշխատանքի խոչընդոտման այս փաստի վրա է հրավիրել Ոստիկանության ուշադրությունը։