Ոսկեհատում հայ-արգենտինական համագործակցության շրջանակում ստեղծվում է փորձացուցադրական դաշտ

ԵՐԵՎԱՆ, 26 ՀՈՒՆԻՍԻ, ԱՐՄԵՆՊՐԵՍ: Արմավիրի մարզի Ոսկեհատ գյուղում շարունակվում են Հայաստանի ազգային ագրարային համալսարանի ու Արգենտինայի գյուղատնտեսական ազգային ինստիտուտի (INTA) միջև համագործակցության նախագծի շրջանակներում նախատեսված փորձացուցադրական դաշտի ստեղծման աշխատանքները, որոնց նպատակն է ներդնել տեղական գյուղատնտեսական մեթոդների համար այլընտրանքային տեխնոլոգիաներ՝ հայ գյուղատնտեսների արտադրողկան ծավալները բարձրացնելու նպատակով:

Այս նախագծին մասնակցող կազմակերպություններն են Հայաստանի Ազգային ագրարային համալսարանը, Հայկական ընդհանուր բարեգործական միությունը, Արգենտինայի Գյուղատնտեսական տեխնոլոգիաների ազգային ինստիտուտը, «Հայաստանի հողեր» - «Կարաս Վայնս» արգենտինական կապիտալով ընկերությունները և Արգենտինայի Արտաքին գործերի նախարարության Հարավ-Հարավ և Եռակողմ համագործակցության արգենտինական ֆոնդը (FO.AR):

Ինչպես «Արմենպրես»-ին տեղեկացրին Հայաստանում Արգենտինայի դեսպանությունից,

հունիսի 26-ին Արգենտինայի դեսպանության գործերի ժամանակավոր հավատարմատար Միգել Չիլինիգիրեանը՝ Ագրարային համալսարանի ռեկտոր Վարդան Ուռուտյանի և Karas Wines ընկերության գյուղատնտես-ինժեներ Մանուել Գոմեսի հետ այցելեց Արմավիրի մարզի Ոսկեհատ գյուղի դաշտ, որը պատկանում է Ագրարային համալսարանին: Նրանց ուղեկցում էին նաև փորձացուցադրական դաշտի պատասխանատու Լիլիթ Սիմոնյանը, Բանջարաբոստանային մշակաբույսերի հետազոտական կենտրոնի պրոֆեսոր Գայանե Սարգսյանը, պայմանագրային աշխատակից Տիգրան Ղարաջյանն ու դեսպանաան աշխատակից Արմինե Ատասունցովան:

Այցելության ընթացքում հաստատվեցին կատարված աշխատանքները, մասնավորապես՝ ջրամբարի, ոռոգման համակարգի, ջրային պոմպակայանի տեղադրումը, ինչպես նաև պլանավորված պիլոտային ցանքի նախապարաստական աշխատանքները, որի նպատակն է ապահովել ցուցադրական միավորի ճշգրիտ գործունեությունը: