368.59
Արայիկ Հարությունյանը «Արարատ-73» թիմի արձանախմբի գողության մասին զրուցել է ՀՀ ոստիկանապետի հետ
2 րոպեի ընթերցում
ԵՐԵՎԱՆ, 20 ՄԱՅԻՍԻ, ԱՐՄԵՆՊՐԵՍ։ Կրթության, գիտության, մշակույթի և սպորտի նախարար Արայիկ Հարությունյանը «Արարատ-73» թիմի ֆուտբոլիստներին նվիրված արձանախմբի մի քանի արձանների գողության մասին զրուցել է ՀՀ ոստիկանապետ Արման Սարգսյանի հետ։ Ինչպես տեղեկացնում է «Արմենպրես»-ը , այս մասին «Ֆեյսբուք»-ի իր էջում գրառում է կատարել ԿԳՄՍ նախարարը։
«Քիչ առաջ տեղեկացա «Արարատ-73» թիմի ֆուտբոլիստներին նվիրված արձանախմբի մի քանի արձանների գողության մասին: Զրուցել եմ ՀՀ ոստիկանապետ Արման Սարգսյանի հետ: Հույս եմ հայտնել, որ անհայրենիք հանցագործները, որոնք կատարել են սույն արարքը, շուտ կբացահայտվեն ու կպատժվեն»,- գրել է Արայիկ Հարությունյանը։
«Արարատ-73»-ի հաղթանակներին նվիրված արձանախմբի մի քանի արձանների գողության փաստով ՀՀ ոստիկանության Մալաթիայի բաժնում նյութեր են նախապատրաստվում։
Ավելի վաղ հայտնի էր դարձել, որ գողացել են «Արարատ-73»-ին նվիրված արձանախմբի մի քանի արձան: Հանցագործները պոկել և տարել են երրորդ շարքում տեղադրված Նիկիտա Սիմոնյանի, Ռոբերտ Ծաղիկյանի, Օնիկ Աբրահամյանի, Հարություն Քեհեյանի արձանները:
Արձանախումբը տեղադրվել էր 2016 թվականին և նվիրված է «Արարատ-73»-ի փառահեղ հաղթանակներին:
Բաժանորդագրվեք մեր ալիքին Telegram-ում