2 րոպեի ընթերցում
ԵՐԵՎԱՆ, 20 ՄԱՅԻՍԻ, ԱՐՄԵՆՊՐԵՍ: «Արարատ-73»-ի ֆուտբոլիստ Սերգեյ Պողոսյանը լեգենդար թիմի արձանախմբի գողացումը համարում է վանդալիզմ:
«Արմենպրես»-ի թղթակցի հետ հենց գողացված արձանախմբի տարածքում զրույցի ընթացքում Պողոսյանը վրդովմունք հայտնեց գողության առնչությամբ՝ շեշտելով, թե որքան մեծ խորհուրդ ունի այս արձանախումբն ամբողջ թիմի համար, հատկապես նրանց համար, ովքեր ողջ են: «Տարիներ է, ինչ դիմում եմ համապատասխան կառույցներին արձանախմբի շրջակայքում տեսաձայնագրման սարք տեղադրելու խնդրանքով, սակայն մինչև օրս որևէ արձագանք չեմ ստացել: Այսօր եղավ այն, ինչ ես համարում եմ վանդալիզմ»,-շեշտեց Պողոսյանը: Լեգենդար թիմի անդամը նկատեց, որ արձանախումբը մի անձի գողություն չէ և այդ ամենին մասնակից են եղել առնվազն 5 մարդ: «Հենց իմացա, անմիջապես եկա տեսնելու: Մեզ համար թանկ են այս արձանները, սա ապտակ էր ազգին, այս գողությունը մեծ ապտակ էր»,-ասաց նա:
Ավելի վաղ հայտնի էր դարձել, որ գողացել են «Արարատ 73»-ի հաղթանակներին նվիրված արձանախմբի մի քանի արձան: Գողերը պոկել և տարել են երրորդ շարքում տեղադրված Նիկիտա Սիմոնյանի, Ռոբերտ Ծաղիկյանի, Օնիկ Աբրահամյանի, Հարություն Քեհեյանի արձանները:
Արձանախումբը տեղադրվել էր 2016 թվականին և նվիրված է «Արարատ 73»-ի փառահեղ հաղթանակներին:
Պատրաստեց Վարվառա Հայրապետյանը