Գավառ քաղաքի սոցիալապես անապահով 300 ընտանիքի օգնության կարգով տրամադրվել է կարտոֆիլի սերմացու
2 րոպեի ընթերցում
ԳԱՎԱՌ, 22 ԱՊՐԻԼԻ, ԱՐՄԵՆՊՐԵՍ: Գավառ քաղաքի սոցիալապես անապահով 300 ընտանիք օգնության կարգով ստացել են կարտոֆիլի բարձրորակ սերմացու, որը պատրաստվում են ցանել առաջիկա օրերի ընթացքում:
Ինչպես «Արմենպրես»-ին տեղեկացրին Գավառի քաղաքապետարանի աշխատակազմից, սերմացուն գնել եւ տնտեսություններին անվճար բաշխել է «Կամրջակ» սոցիալ -բարեգործական հասարակական կազմակերպությունը:
«Կամրջակ» ՀԿ նախագահ Մարիա Գորիսի եւ Գավառ համայնքի ղեկավար Գուրգեն Մարտիրոսյանի համագործակցության արդյունքում «Կամրջակ»-ի կողմից Գավառի 300 սոցիալապես անապահով ընտանիքների հատկացվեց կարտոֆիլի սերմացու: Յուրաքանչյուր ընտանիք ստացել է 100 կիլոգրամ բարձրորակ սերմացու: Կարտոֆիլի սերմացուների տրամադրումը համայնքում լուծել է նաեւ սերմացուի վերաթարմացման խնդիր: Օգնությունն ամբողջությամբ բաժանվել է հողոօգտագործող ընտանիքներին, որոնց մեծ մասը բնակվում են քաղաքի Հացառատ եւ Արծվաքար թաղամասերում: Առաջիկա օրերի ընթացքում տնտեսություններում կկատարվի ցանքը, որի աշխատանքներին հետամուտ կլինի համայնքապետարանը: Սա «Կամրջակ» ՀԿ-ի հետ մեր համագործակցության առաջին քայլն է, որը, հուսանք, կունենա արդյունավետ շարունակություն»,-նշեց Գավառի քաղաքապետի տեղակալ Գրիգոր Բոշյանը:
Խոսրով Խլղաթյան