Քննարկվել է ԵՄ-Հայաստան համագործակցությունը ԵՄ «Կանաչ համաձայնագրի» համատեքստում

ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: ԵՄ-Հայաստան Էներգետիկայի, տրանսպորտի, շրջակա միջավայրի, կլիմայի գործողությունների և քաղաքացիական պաշտպանության հարցերով վեցերորդ ենթակոմիտեի հանդիպումը տեղի է ունեցել մարտի 11-ից 12-ը: «Արմենպրես»-ին այս մասին հայտնեցին ՀՀ-ում ԵՄ պատվիակության քաղաքական, մամուլի և տեղեկատվության բաժնից:

Հանդիպման ընթացքում քննարկվել է ԵՄ-Հայաստան համագործակցությունը ԵՄ «Կանաչ համաձայնագրի» համատեքստում, որի նպատակն է մինչև 2050 թվականը՝ Եվրոպան դարձնել ածխածնի չեզոք մայրցամաք: Ենթակոմիտեի կողմից արձանագրվել է առաջընթաց ԵՄ-Հայաստան Համապարփակ և ընդլայնված գործընկերության համաձայնագրից բխող ԵՄ չափանիշների մոտարկման ուղղությամբ՝ ենթակոմիտեի տիրույթում ընդգրկված ոլորտներում, այդ թվում այն ոլորտներում, որտեղ նախատեսվում է խորացնել համագործակցությունը ԵՄ տեխնիկական և ֆինանսական աջակցության միջոցով: Կորոնավիրուսի ներկա համաճարակի պատճառով հանդիպումն անցկացվեց Երևանի և Բրյուսելի միջև տեսակոնֆերանսի ձևաչափով։

Հայկական պատվիրակությունը ղեկավարում էր ՀՀ Տարածքային կառավարման և ենթակառուցվածքների նախարարի տեղակալ Հակոբ Վարդանյանը, ԵՄ կողմը ղեկավարում էր Եվրոպական արտաքին գործողությունների ծառայության բաժնի ղեկավար Ռիչարդ Թիբբելսը: Այս տարի առաջին անգամ ենթակոմիտեի հանդիպմանը հաջորդեցել են ԵՄ-Հայաստան ավելի խորացված փորձագիտական խորհրդակցություններ՝ ըստ 2019 թվականի նոյեմբերին ԵՄ-Հայաստան Գործընկերության հանձնաժողովի ընթացքում ձեռք բերված համաձայնության: Նշյալ առաջին խորհրդակցություններն անցկացվել են օդի և ջրի որակի թեմատիկ ուղղություններով: