2 րոպեի ընթերցում
ԵՐԵՎԱՆ, 6 ՄԱՐՏԻ, ԱՐՄԵՆՊՐԵՍ: Սփյուռքում ապրող և մագիստրոսի կրթական աստիճան ունեցող 20 երիտասարդ հնարավորություն կունենա մեկ տարով աշխատել Հայաստանի Հանրապետության նախարարություններում ու գերատեսչություններում:
«Արմենպրես»-ի փոխանցմամբ` այս մասին մարտի 6-ին ՀՀ վարչապետ Նիկոլ Փաշինյանի հետ հանդիպման ընթացքում ասաց Սփյուռքի գործերի գլխավոր հանձնակատար Զարեհ Սինանյանը:
«Առաջին անգամ կառավարությունը սկսում է պրակտիկայի ծրագիր, որի նպատակն է աշխարհի լավագույն համալսարաններն ավարտած, բարձր մասնագիտական կարողություններ ունեցող մեր հայրենակիցներին պրակտիկանտի կարգավիճակով ներգրավել Հայաստանի կառավարական համակարգում»,- ասաց Սինանյանը:
Սփյուռքի գործերի գլխավոր հանձնակատարը նշեց, որ «իԳործ» ծրագրում ներգրավված են բոլոր նախարարություններն ու գերատեսչությունները՝ բացի ՀՀ պաշտպանության նախարարությունից և ատոմային էներգետիկայի հետ առնչվող կառավարական մարմնից:
«Նախարարություններն ու գերատեսչություններն ուղարկել են իրենց կարիքների ցուցակը, թե ինչ մասնագետների անհրաժեշտություն ունեն: Կառավարությունն ընտրված 20 անձանց համար հոգում է և ՀՀ տեղափոխվելու, և 336 հազար դրամով կեցության ծախսերի գումարը, որպեսզի հնարավոր դարձնի այս մարդկանց համար Հայաստանում աշխատելն ու ապրելը: Ծրագիրը կմեկնարկի 2020թ. հուլիսի 1-ին, կավարտվի 2021թ. հունիսի 30-ին»,- նշեց Զարեհ Սինանյանը:
Սփյուռքի գործերի գլխավոր հանձնակատարի գրասենյակի կողմից իրականացվող «իԳործ» ծրագրին դիմելու վերջնաժամկետը ապրիլի 15-ն է: Ծրագրին դիմելու համար պետք է անցնել հղմամբ և լրացնել հայտադիմումը: