ՓՄՁ-ներին աջակցության հիմնական գործիքը համատեղ օգտագործման ռեսուրս կենտրոնների ստեղծումն է

ԵՐԵՎԱՆ, 7 ՓԵՏՐՎԱՐԻ, ԱՐՄԵՆՊՐԵՍ: Հայաստանում մեկնարկել է արտահանման խթանման նոր ծրագիր, որն ուղղված է փոքր և միջին բիզնեսին: Համաշխարհային բանկի կողմից ֆինանսավորվող «Առևտրի խթանման և որակի ենթակառուցվածքի» ծրագրի շրջանակում ՀՀ էկոնոմիկայի նախարարությունը, «Ներդրումների աջակցման կենտրոն» հիմնադրամի հետ համագործակցությամբ, սկսում է «Արտահանողի զարգացման դրամաշնորհներ» ծրագիրը: Այն ենթադրում է զգալի աջակցություն փոքր և միջին բիզնեսի ներկայացուցիչներին, որոնք նպատակ ունեն հզորացնել իրենց կարողությունները՝ արտահանման ծավալներն ընդլայնելու համար: «Արմենպրես»-ի մամուլի սրահում հրավիրված ասուլիսում ՀՀ էկոնոմիկայի նախարարի տեղակալ Նաիրա Մարգարյանը նշեց, որ աջակցությունը լինելու է 70 տոկոսի չափով:

«Հաճախ փոքր և միջին ձեռնարկություններն իրենց աճի ընթացքում գալիս հասնում են որոշակի փուլի, որտեղ իրենց ռեսուրսները չեն բավարարում առաջ գնալու, ընդլայնվելու համար: Այստեղ է, որ մենք պետք է կարողանանք օգնել փոքր և միջին ձեռնարկություններին: Աջակցության հիմնական գործիքը համատեղ օգտագործման ռեսուրս կենտրոնների ստեղծումն է»,-ասաց Նաիրա Մարգարյանը: Այն իր մեջ ներառում է լոգիստիկ կենտրոններ, տրանսպորտային միջոցներ, մարքետինգի ծառայություններ, արտադրական հանգույցներ և այլն: Օրինակ, պահածո արտադրող փոքր ընկերությունը փորձում է արտահանում կազմակերպել ռուսաստանյան շուկա: Արտադրողը մի շարք խնդիրների առաջ է կանգնում՝ տեղեկատվության, կապերի պակաս, որակի, ստանդարտացման հարցեր և այլն: Դրանից բացի, արտահանման համար անհրաժեշտ ծավալներ ապահովելու խնդիր էլ կա: Այստեղ կարող է առաջանալ կոլեկտիվ ապրանքային նշանի ստեղծման անհրաժեշտություն, մի քանի ՓՄՁ-ներից ապրանքների հավաքագրման խնդիր և այլն: Բոլոր հարցերում ռեսուրս կենտրոններն աջակցելու են, ուղղորդելու են արտադրողներին:

«Ներդրումների աջակցման կենտրոն» հիմնադրամի Միջազգային համագործակցության և բիզնեսի միջազգայնացման ծրագրերի համակարգող Լիլիթ Ափուջանյանը ներկայացրեց ծրագրի դիմելիության պահանջները: Դիմորդը պետք է հանդիսանա իրավաբանական անձ՝ նվազագույնը երկու տարվա պետական գրանցմամբ, լինի շահույթ հետապնդող, հիմնված՝ ՀՀ-ում, ուղղակիորեն պատասխանատու ծրագրի նախապատրաստման, իրականացման և կառավարման համար, կարողանա համաֆինանսավորել տվյալ դրամաշնորհի ծրագիրը: Այսինքն՝ դրամաշնորհը տրամադրվում է ծախսերի 70 տոկոսի չափով, 30 տոկոսը դիմորդն ինքը պետք է ի վիճակի լինի ֆինանսավորել:

«Մրցույթը բաց է արտահանման ներուժ ունեցող ցանկացած ոլորտի համար, սակայն առաջնահերթություն կտրվի գյուղատնտեսությանը, սննդի վերամշակմանը և տեքստիլին: Կան սահմանափակումներ. դրանք ալկոհոլային խմիչքներն են, ծխախոտը, ռադիոակտիվ նյութերը, ոսկու արտադրությունը և այլն: Հաշվի առնելով գինեգործության ոլորտի նշանակությունը մեր երկրի համար՝ հնարավորություն ունեցանք Համաշխարհային բանկից այդ բացառությունը ստանալ, և գինեգործությունը կհամարվի իրավասու ոլորտներից մեկը»,-ասաց Լիլիթ Ափուջանյանը:

Ծրագրի ընդհանուր բյուջեն կազմում է 1 մլն 800 հազար ԱՄՆ դոլար: Գյուղատնտեսության և սննդի վերամշակման համար նվազագույնը սահմանվել է 30 մլն դրամ, առավելագույնը՝ 230 մլն դրամ: Այլ ոլորտների համար նվազագույն շեմը 15 մլն դրամ է, առավելագույնը՝ 140 մլն դրամ: Տրվող գումարը դիմողը կարող է ծախսել փոքրածավալ վերանորոգման և վերակառուցման, արտադրական գործընթացների արդիականացման, նոր սարքավորումների, հումքի և ապրանքների ձեռք բերման, որակի կառավարման համակարգերի ներդրման ուղղությամբ և այլն: Գումարը տրվելու է փուլ առ փուլ:

Ծրագիրը մեկնարկել է փետրվարի 5-ին, հետաքրքրվողները կարող են դիմել մինչև մարտի 20-ը: Մանրամասները ներկայացված են www.smednc.am, www.isc.am կայքէջերում: