1 րոպեի ընթերցում
ԵՐԵՎԱՆ, 3 ՓԵՏՐՎԱՐԻ, ԱՐՄԵՆՊՐԵՍ: Հայաստանի շախմատի տղամարդկանց թիմի առաջատար Լևոն Արոնյանը մասնակցեց Հայաստանի ֆիզիկական կուլտուրայի և սպորտի պետական ինստիտուտի կողմից կազմակերպած դասախոսական միջբուհական շախմատի առաջնությանը:
«Արմենպրես»-ի հաղորդմամբ` Արոնյանն առաջին անգամ սեանս անցկացրեց իր հարազատ ինստիտուտում: Հայ գրոսմայստերը միաժամանակյա սեանս անցկացրեց 9 խաղատախտակի վրա, որտեղ մրցեցին 7 ԲՈՒՀ-երի ներկայացուցիչներ: «Ես ամբողջ աշխարհում սեանս տվել եմ, բայց այստեղ չէ, սա ինձ համար շատ հետաքրքիր է, գիտեմ, որ բարդ է լինելու»,-շեշտեց նա:
Հայաստանի ֆիզիկական կուլտուրայի և սպորտի պետական ինստիտուտի ռեկտոր Դավիթ Խիթարյանն էլ ողջունեց նման մրցաշարերի անցկացումը և վստահեցրեց ՝ խաղը հետաքրքիր է լինելու: Հետաքրքիր ու լարված պայքար ընթացավ դասախոսների և գրոսմայստերի միջև: Բոլոր պարտիաներն ավարտվեցին Արոնյանի հաղթանակով: