2 րոպեի ընթերցում
ԵՐԵՎԱՆ, 27 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ տնտեսական մրցակցության պաշտպանության պետական հանձնաժողովն ուշադրության կենտրոնում է պահել գազալցակայանների ոլորտը:
«Արմենպրես»-ի մամուլի սրահում հրավիրված ասուլիսում ՀՀ տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը նշեց, որ բացահայտվել են օրենսդրական պահանջներին չհամապատասխանող գործունեության դեպքեր:
«Ասվում է, որ պետք է լինի 200 մթնոլորտային ճնշման գազ, սակայն ստուգումներն այլ բան են ցույց տվել, այդ պահանջները մի շարք դեպքերում չեն պահպանվել: Դա անվտանգության խնդիր է, և մենք այն փոխանցեցինք համապատասխան տեսչական մարմիններին»,-ասաց Գեղամ Գևորգյանը:
Գլոբալ խնդիրն այս ոլորտում այն է, որ, կասկածներ կան ստվերի հետ կապված:
«Մենք համեմատում ենք նախկինում աշխատած մարժայի ցուցանիշները ներկայիս ցուցանիշների հետ և տեսնում ենք, որ այստեղ լուրջ խնդիր կա: Կամ կա ստվեր, կամ այլ տեղից գազ է թաքցվել: Միգուցե հաշվապահությունը ճիշտ չի ցույց տվել իրական պատկերը»,-ասաց Գեղամ Գևորգյանը:
Հանձնաժողովի նախագահը նշեց, որ որոշ ԱԳԼՃԿ-ներում մարդիկ գազն իրենց հաշվարկած ինքնարժեքից ավելի ցածր են վաճառում, քան պետք է: Հարցին, թե միգուցե գազալցակայանները դեմպինգի են դիմում, Գեղամ Գևորգյանը նշեց, որ նրանք փոքր ընկերություններ են, և դեմպինգի գնալն իրենց դեպքում իմաստ չի ունենա: Հանձնաժողովը շարունակելու է հետևել այս միտումին: