Հակառակորդի նախահարձակ գործողության հետևանքով տուժած զինծառայողները փոխհատուցում կստանան
2 րոպեի ընթերցում
ԵՐԵՎԱՆ, 26 ԴԵԿՏԵՄԲԵՐԻ, ԱՐՄԵՆՊՐԵՍ: Կառավարությունը հավանություն տվեց «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքի փոփոխություններին, ըստ որի զինծառայողների կյանքին կամ առողջությանը պատճառված վնասների հատուցման դեպքերում շարքում ներառվում է հակառակորդի նախահարձակ գործողության հետեւանքով տեղի ունեցած դեպքերը:
Պաշտպանության նախարար Դավիթ Տոնոյանը նշեց, որ զինված ուժերի գործունեության ընթացքում առկա են եղել դեպքեր, երբ հակառակորդի կողմից զինծառայողների կյանքին կամ առողջությանը վնասը պատճառվել է այնպիսի պայմաններում, երբ տեղի չեն ունեցել անմիջական մարտական գործողություններ կամ զինծառայողները չեն գտնվել մարտական հերթապահության մեջ կամ չեն կատարել հատուկ առաջադրանք: «Նման դեպքեր տեղի են ունեցել հակառակորդի հեռահար հրետակոծության կամ առաջնագծից երկրի խորք ընկած տարածքում դիվերսիոն-հետախուզական խմբի գործողության արդյունքում: 2008 թվականից սկսած հակառակորդի նախահարձակ գործողության հետևանքով թվով 10 զինծառայողների կյանքին կամ առողջությանը պատճառվել է վնաս: Նման դեպքերում զինծառայողի կարգավիճակը սահմանվել է որպես ծառայողական պարտականությունների կատարման շրջանակներում տեղի ունեցած դեպք, ինչը սակայն, ըստ էության, չի բնորոշում համապատասխան դեպքի իրական հանգամանքը եւ սոցիալական պաշտպանվածության առումով չի ապահովում որոշակիորեն համարժեք վիճակ»,- «Արմենպրես»-ի փոխանցմամբ, ասաց նախարարը:
Դավիթ Տոնոյանի խոսքով՝ սրանով լուծվում է անարդարությունը: «Հոգաբարձուների խորհուրդը համապատասխան որոշում կկայացնի և կտարածի կարգավորումը մինչև 1998 թվականը ընկած դեպքերի վրա»,- ասաց նա: