ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Սևանա լճից ջրի բացթողման ընթացքում ոռոգման ջուրը տեղ է հասնում մեծ կորուստներով: Սակայն պետությունը՝ ի դեմս Տարածքային կառավարման և ենթակառուցվածքների նախարարության ջրային կոմիտեի, խնդիրը հաղթահարելու ուղղությամբ աշխատանքներ է տանում: «Արմենպրես»-ի հաղորդմամբ՝ այս մասին խորհրդարանում Սևանա լճից լրացուցիչ ջրառը բացառող օրենքի նախագծի քննարկման ընթացքում հայտնեց կոմիտեի նախագահ Վարդան Մելքոնյանը՝ պատասխանելով պատգամավոր Թագուհի Թովմասյանի հարցին:

Թագուհի Թովմասյանը հիշեց, որ երբ մի առիթով հենց Սևանա լճի ափին քննարկման է եղել, աշխատակիցները բարձրաձայնել են, որ տարիներ շարունակ լճից բաց թողնված ջուրը Արարատյան դաշտավայր է ասել 40-60 տոկոս կորուստներով: Նա հետաքրքրվեց, թե կորուստների նվազեցման համար ինչ քայլեր են իրականացվել:

«Ունենք Եվրասիական զարգացման բանկով վարկային ծրագիր, որի մեջ ներառված է նաև առաջնային, երկրորդային ջրանցքների շինարարությունը: Դրանց շինարարությունն ընթացքի մեջ է: Անհրաժեշտ է ժամանակ, որ ունենանք տեխնիկական հնարավորություն՝ նվազեցնելու կորուստները: Այո, կորուստները բարձր են, ընդունում եմ, և դրա դեմ  փաստարկ չունեմ»,-ասաց Մելքոնյանն ու հավելեց՝  այդ ուղղությամբ, սակայն, աշխատում են: