Սասուն Միքայելյանը կողմ է եղել, որ ՔՊ-ն Հրազդանի քաղաքապետի պաշտոնում չպաշտպանի իր որդու թեկնածությունը
ԵՐԵՎԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: ԱԺ «Ելք» խմբակցության անդամ Սասուն Միքայելյանը արդար ընտրություններ անցկացնելու տեսանկյունից առավել շահեկան վիճակ է համարում, որ Քաղաքացիական պայմանագիր կուսակցությունը չի պաշտպանում իր որդու՝ Սևակ Միքայելյանի թեկնածությունը Հրազդանի քաղաքապետի պաշտոնում: «Արմենպրես»-ի հաղորդմամբ՝ պատգամավորը նման տեսակետ հայտնեց լրագրողների հետ ճեպազրույցում:
«Նրանում, որ կուսակցությունը չի պաշտպանում, ես խնդիր չեմ տեսնում: Ես էլ եմ կողմ եղել, որ կուսակցությունից չպաշտպանեն նրա թեկնածությունը, որ արդար ընտրություններ անցնեն: Ինձ համար գերադասելի է հեղափոխության արդյունքում ժողովրդի ոգևորությունը, քան անձինք»,-վստահեցրեց Միքայելյանը:
Նա նշեց՝ իր որդին 25 տարեկան, չափահաս տղա է, ով իրավունք ունի մասնակցել երկրում կայանալիք բոլոր իրադարձություններին: «Այսօր առավել շահեկան վիճակ է, որ մեր կուսակցությունը չի պաշտպանում նրա թեկնածությունը: Այսինքն՝ հնարավորություն է տվել, որ մարդիկ նման շահարկումներ չանեն: Արդար ընտրություններ պիտի անցնեն: Եթե իմ տղան է, ուրեմն ոչ մի բանի չպիտի՞ մասնակցի»,-նշեց Միքայելյանը:
Ավելի վաղ «Քաղաքացիական պայմանագիր» կուսակցությունը հայտարարել էր, որ նպատակահարմար չի գտնում Հրազդանի քաղաքապետի ընտրություններում պաշտպանել կուսակցության անդամ Սևակ Միքայելյանի թեկնածությունը: Հրազդանի համայնքապետի արտահերթ ընտրությունները տեղի կունենան հոկտեմբերի 21-ին: Ընտրություններին մասնակցելու համար առաջադրվել է 5 թեկնածու:
Բաժանորդագրվեք մեր ալիքին Telegram-ում