ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: ԵԱՀԿ Մինսկի խմբի եռանախագահները կայցելեն տարածաշրջան հոկտեմբերի առաջին կեսին՝ նախապատրաստելու Հայաստանի եւ Ադրբեջանի նախագահների հանդիպումը:

«Արմենպրես»-ի հաղորդմամբ՝ այս մասին Միացյալ Թագավորության Եվրոպայի և Ամերիկաների հարցերով պետնախարար Ալեն Դանքնի հետ համատեղ ասուլիսի շրջանակում հայտարարեց ՀՀ արտգործնախարար Էդվարդ Նալբանդյանը:

 «Նյու Յորքում Հայաստանի և Ադրբեջանի արտաքին գործերի նախարարների միջև տեղի ունեցած հանդիպման ժամանակ խոսվել է երկու երկրների նախագահների մակարդակով առաջիկայում հանդիպում անցկացնելու, ինչպես նաեւ եռանախագահների` տարածաշրջան այցելության մասին»,-ասաց նա:

Մեկնաբանելով Ադրբեջանի ԱԳ նախարարի մամուլի խոսնակի հայտարարությունն այն մասին, թե Էլմար Մամեդյարովը համաձայնել է ՄԽ եռանախագահների հնչեցրած առաջարկներին՝  Էդվարդ Նալբանդյանն  ասաց.

«Միայն Ադրբեջանում կարող են ասել, թե ինչ առաջարկներ են գրգռել իրենց հետաքրքրությունը»: