Հովհաննես Գաբուզյանը 3-րդն էր իտալական մրցաշարում

ԵՐԵՎԱՆ, 22 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանցի շախմատիստ Հովհաննես Գաբուզյանը հաջողությամբ ավարտեց ելույթները իտալական շախմատային մրցաշարում:

Իտալիայի Պադուա քաղաքում երեկ երեկոյան ավարտված բաց մրցաշարում փայլուն արդյունքի է հասել երևանցի գրոսմայստեր Հովհաննես Գաբուզյանը, որը 9 հնարավորից վաստակել է 6.5 միավոր և բուլղարացի հանրահայտ գրոսմայստեր Կիրիլ Գիորգիևի հետ բաժանելով 2-3 տեղերը լրացուցիչ ցուցանիշներով արժանացել 3-րդ մրցանակին: Մրցաշարի հաթող է ճանաչվել Ուկրաինայի ներկայացուցիչ Յուրի Վովկը:

«Արմենպրես»-ի հաղորդմամբ, այս մասին տեղեկացնում է Հայաստանի շախմատի ֆեդերացիան:

Մինչ այս Հովհաննես Գաբուզյանը Միլանում անցկացված Կրեսպիի հուշամրցաշարում 9 հնարավորից վաստակել էր 5,5 միավոր և 28 մասնակիցների մեջ գրավել չորրորդ տեղը: 7 միավորով մրցաշարի հաղթող էր դարձել գրոսմայստեր Էդուարդաս Ռոզենտալիսը (Լիտվա):