387.58
«Բաց դաս»-ի շրջանակում ԱԺ են այցելել Երևանի ակադեմիական ավագ դպրոցի աշակերտները
2 րոպեի ընթերցում
ԵՐԵՎԱՆ, 11 ՍԵՊՏԵՄԲԵՐԻ, ԱՐՄԵՆՊՐԵՍ: «Բաց դռներ» ծրագրի շրջանակներում սեպտեմբերի 11-ին Ազգային ժողով են այցելել Երևանի ակադեմիական ավագ դպրոցի մի խումբ աշակերտներ և ուսուցիչներ: Ինչպես «Արմենպրես»-ին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից, բաց դասը վարել է Ազգային ժողովի նախագահ Գալուստ Սահակյանը, ով երեխաներին շնորհավորել է նոր ուսումնական տարվա առթիվ՝ մաղթելով նրանց հաջողություններ ուսման ընթացքում:
Ներկայացնելով խորհրդարանի գործունեությունը և կառուցվածքը՝ ՀՀ ԱԺ նախագահը կարևորել է երիտասարդության մասնակցությունը պետության հասարակական եւ քաղաքական կյանքին: Գալուստ Սահակյանը հպարտությամբ է խոսել միջազգային օլիմպիադաներում հայ դպրոցականների նվաճումների մասին՝ նշելով, որ լավ հայ, լավ քաղաքացի դաստիարակելն այսօր նույնպես նվաճում է և կրթության գաղափարախոսության կարևոր բաղադրիչը: Խորհրդարանի ղեկավարը հորդորել է աշակերտներին լավ սովորել և շատ ընթերցել՝ կարևորելով գեղարվեստական գրականության և ընթերցանության դերը հայրենասեր, բարեկիրթ, գրագետ մարդու դաստիարակության գործում:
Այնուհետև ԱԺ նախագահը սիրով պատասխանել է աշակերտների հարցերին, որոնք վերաբերել են դպրոցական ավարտական քննություններին, կրթության բնագավառի բարեփոխումներին, նախամասնագիտական կրթությանը և կրթությունն արտասահմանում շարունակելու հնարավորություններին:
Հանդիպման ավարտին ՀՀ ԱԺ նախագահ Գալուստ Սահակյանը ԱԺ նիստերի դահլիճում լուսանկարվել է ուսուցիչների և աշակերտների հետ:
