«Վեսթ Բրոմվիչ»-ը պատրաստ է Մովսիսյանի համար առաջարկել 9 մլն ֆունտ

ԵՐԵՎԱՆ, 6 ՀՈՒՆԻՍԻ, ԱՐՄԵՆՊՐԵՍ: Անգլիական «Վեսթ Բրոմվիչ»-ը պատրաստ է Հայաստանի ազգային հավաքականի հարձակվող Յուրա Մովսիսյանին ձեռք բերելու համար Մոսկվայի «Սպարտակ»-ին առաջարկել 9 միլիոն ֆունտ ստեռլինգ: Talksport-ի հաղորդմամբ` Մովսիսյանը համարվում է անգլիական Պրեմիեր լիգայում տեղը պահպանած ակումբի հիմնական նպատակը: «Արմենպրես»-ի փոխանցմամբ` աղբյուրը հայտնում է, որ կողմերի միջև բանակցությունները կմեկնարկեն հաջորդ շաբաթ:

«Յուրա Մովսիսյանին մոտ կանգնած աղբյուրների հավաստմամբ` հայազգի ֆուտբոլիստը ձգտում է տեղափոխվել Անգլիա»,- գրում է Talksport-ը:

Ավելի վաղ հայտնի էր դարձել, որ Մովսիսյանի ծառայություններով հետաքրքրված են գերմանական ակումբներ, ինչպես նաև անգլիական «Տոտենհեմ»-ը, «Լիվերպուլ»-ը և «Էվերթոն»-ը:

Հայտնի է, որ այս ակումբների սկաուտներն այսօր ներկա են գտնվելու Գերմանիա-Հայաստան ընկերական հանդիպմանը, որում կհետևեն Հայաստանի հավաքականի գոլահարին: