Նույնիսկ ծպտյալ գործունեության տարիներին Գևորգ Վարդանյանն արձակուրդներին Երևան էր գալիս
ԵՐԵՎԱՆ, 10 ՀՈՒՆՎԱՐԻ, ԱՐՄԵՆՊՐԵՍ: Գևորգ Վարդանյանի հիշատակը պահելու լավագույն տուրքը կլինի նրա օրինակով` հայրենասիրությամբ, մատաղ սերնդին դաստիարակելը: «Արմենպրես»-ի հետ զրույցում նման տեսակետ հայտնեց լրագրող, Գևորգ Վարդանյանի կենսագրությունը ներկայացնող երկու գրքերի հեղինակ Գուրգեն Խաժակյանը:
«Իմ կյանքի և մասնագիտական գործունեության լավագույն պահերը կապված են եղել հենց Գևորգ և Գոհար Վարդանյանների նվիրված գրքերի պատրաստման հետ»,- նշեց Խաժակյանը: Նա ընդգծեց, որ Վարդանյանն իր կյանքի 30 տարիները ծպտյալ աշխատել է կնոջ հետ արտերկրում և չի բացահայտվել: Գևորգ Վարդանյանը Խորհրդային Միության միակ հետախույզն էր, որ արժանացել է Հերոսի կոչման կենդանության օրոք և ոչ պատերազմական տարիներին: Վարդանյան հետախույզների ընտանիքի մասին Գուրգեն Խաժակյանը հեղինակել է «Հպում լեգենդին» և «Հպումը լեգենդին շարունակվում է» գրքերը:
«Կարելի է ասել, որ նա մեր վերջին կենդանի լեգենդն էր, մեր մեծագույն հպարտությունը, և ինչը թերևս ամենակարևորն էր` նա հոգով-սրտով հայ էր: Նույնիսկ ծպտյալ ապրելու տարիներին նա արձակուրդների ընթացքում գալիս էր Երևան»,- պատմեց Խաժակյանը: Նա նաև տեղեկացրեց, որ Վարդանյանը վերջին անգամ այս աշնանն էր եղել Երևանում: Գեւորգ Անդրեյի Վարդանյանը 2009 թվականին ՀՀ Նախագահի կողմից պարգեւատրվել Պատվո շքանշանով:
Խորհրդային Միության հերոս, ՀՀ Պատվո շքանշանակիր լեգենդար հետախույզ Գևորգ Վարդանյանը կյանքի 88-րդ տարում վախճանվել է անբուժելի հիվանդությունից Մոսկվայի Բոտկինի անվան հիվանդանոցում հունվարի 10-ի երեկոյան:
Բաժանորդագրվեք մեր ալիքին Telegram-ում