Մեծ Բրիտանիայում այսօր ապրում է 18-20 հազար հայ

ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ (թղթ. Լուսինե Մխիթարյան):ՀՀ սփյուռքի նախարարության գործունեության արդյունավետությունը պայմանավորված է հայկական համայնքների հետ համագործակցությամբ: Ինչպես «Արմենպրեսե-ի հետ զրույցում նշեց ճարտարագետ եւ քարտեզագետ Ռուբեն Գալչյանը, սփյուռքի նախարարությունը կարող է օգտակար աշխատանք տանել. անհրաժեշտ է երկար ժամանակ ծրագրեր մշակելու, նաեւ սփյուռքահայ ղեկավարների հետ խորհրդակցելու համար, քանի որ նրանք ավելի լավ գիտեն իրենց համայնքների խնդիրներն ու հնարավորությունները: Նախարարության առաքելություններից մեկը պետք է լինի հայ արվեստագետին, մտավորականին օժանդակելն ու աջակցելը, որպեսզի նա հայ մշակույթը ներկայացնի սփյուռքում, ինչպես նաեւ, սփյուռքի մտավորականներին, արվեստագետներին հայրենիք բերելով` հայաստանաբնակներին ներկայացնի սփյուռքում ստեղծված արժեքները: Բնակվելով Մեծ Բրիտանիայում եւ ծանոթ լինելով այնտեղի հայ համայնքի առանձնահատկություններին` Ռուբեն Գալչյանը նշեց, որ ժամանակ է պետք, որ սփյուռքի նորաստեղծ նախարարությունը կարողանա ծանոթանալ համայնքի կառուցվածքին, խնդիրներին: Մեծ Բրիտանիայում այսօր ապրում է 18-20 հազար հայ, որոնցին 4-5 հազարը վերջին տարիներին Հայաստանից մեկնածներն են: Նրանցից 10 հազարը բնակվում է հիմնականում Լոնդոնում եւ նրա շրջակայքում, իսկ մնացածը` տարբեր քաղաքներում: Ըստ Ռ. Գալչյանի` համայնքի փոքր լինելով է պայմանավորված նրանում հասարակական եւ այլ կազմակերպությունների սակավությունը: Ներկայումս համայնքում գործում են կիրակնօրյա դպրոցներ, որտեղ հայ երեխաներին հնարավորություն է տրվում սովորել հայոց լեզու, հայ գրականություն եւ պատմություն: Այդ դպրոցներ այցելում է 250-300 երեխա: Ըստ Ռ. Գալչյանի` դրանով ինչ-որ չափով լուծվում է հայապահպանության խնդիրը: Նրա տեղեկացմամբ, կան նաեւ մարզական, մշակութային կազմակերպություններ. Հայկական ինստիտուտը զբաղվում է մշակութային ձեռնարկներով, դասախոսությունների, հանդիսությունների, համերգների կազմակերպմամբ, որով թե հային, թե օտարին ծանոթացնում են հայ մշակույթին: Հայերի համար հիմնական հավաքատեղին եկեղեցին է: Նշենք, որ Ռ. Գալչյանը 1991-2000 թվականներին եղել է Մեծ Բրիտանիայում ՀՀ պատվո հյուպատոս: Այս տարի նոյեմբերին Հայաստանում գիտության զարգացմանը նպաստելու համար ՀՀ ԳԱԱ նախագահության կողմից նրան շնորհվել է պատվավոր դոկտորի կոչում: Նա իր անմիջական մասնակցությունն է ունեցել 2000 թվականին ստեղծված «Հայաստանի բարեկամներե բարեգործական կազմակերպությանը, որը Հայաստանում իրականացրել է 1 մլն արժողությամբ շուրջ 200 ծրագրեր, ինչպես նաեւ 1988 թվականի երկրաշարժից հետո հիմնադրված «էյդ Արմենիաե կազմակերպությանը, որը կատարել է 12 մլն դոլարի ներդրում, մասնավորապես` կառուցվել է Վանաձորի Սբ Նարեկ մանկական հիվանդանոցը: