ԵՐԵՎԱՆ, 10 ՄԱՅԻՍԻ, ԱՐՄԵՆՊՐԵՍ: Բելգիան 9 միլիոն եվրոյի չափով լրացուցիչ օգնություն կհատկացնի Ուկրաինային` վնասված էներգետիկ ենթակառուցվածքների վերանորոգման համար: Ինչպես «Արմենպրես»-ը տեղեկանում է «Ինտերֆաքս» գործակալությունից, այդ մասին հայտնել է Բելգիայի հանուն զարգացման համագործակցության նախարար Քերոլին Ժեննեն։

«Ուկրաինայի էներգետիկ ենթակառուցվածքը հնացած է և չափազանց կենտրոնացված, ինչը նրան շատ խոցելի է դարձնում», - ասել է նախարարը RTBF հեռուստաալիքի եթերում։

9 միլիոն եվրոն կուղղվի ՄԱԿ-ի Զարգացման ծրագրի (ՄԱԿԶԾ) միջոցով, որը կազմակերպել է մի համակարգ, որը թույլ է տալիս արագորեն պահեստամասեր գնել և նոր սարքավորումներ մատակարարել վնասված կամ ավերված ենթակառուցվածքների վերանորոգման համար: Միևնույն ժամանակ, ըստ Ժեննեի, ՄԱԿԶԾ-ն «շեշտը դնում է էներգիայի կայուն և ապակենտրոնացված աղբյուրների վրա»:

Նախարարի խոսքով՝ «ռազմական օգնության հետ միասին այս աջակցությունը կնպաստի Ուկրաինայի կայունության ամրապնդմանը»։