ԵՐԵՎԱՆ, 28 ՄԱՐՏԻ, ԱՐՄԵՆՊՐԵՍ: Էկոնոմիկայի նախարարի տեղակալ Արման Խոջոյանը մասնակցել է «Գյուղատնտեսության ոլորտի դիմակայության և արդյունավետության բարձրացում․ հանրային ներդրումների առաջնահերթությունների քննարկում» աշխատաժողովին

«Արմենպրես»-ի փոխանցմամբ՝ այս մասին տեղեկացնում են նախարարությունից:

Աշխատաժողովը կազմակերպվել է ՀՀ էկոնոմիկայի նախարարության և Համաշխարհային բանկի համատեղ նախաձեռնությամբ։

Միջոցառման նպատակն էր որոշել հանրային ներդրումների առաջնահերթությունները՝ կլիմայի փոփոխության նկատմամբ գյուղատնտեսության ոլորտի դիմակայությունը, ինչպես նաև արդյունավետությունն ու մրցունակությունը բարձրացնելու նպատակով։

«Կլիմայի փոփոխության բացասական ազդեցությունը նկատելի է ոչ միայն գյուղատնտեսության, այլ նաև տնտեսության մի շարք այլ ճյուղերում. էկոհամակարգերի և կենսաբազմազանության, ջրային ռեսուրսների օգտագործման ոլորտներում, ուստի չափազանց կարևոր է ցուցաբերել միասնական մոտեցում քաղաքականության մշակման և առկա մարտահրավերներին դիմակայելու հարցում լուծումների առաջարկման տեսնակյունից», - նշել է Արման Խոջոյանը։

Նախարարի տեղակալը միաժամանակ ընդգծել է, որ խնդիրների հնարավոր լուծումները համատեղ ուսումնասիրելիս հարկավոր է նկատի ունենալ նաև դրանց ազդեցությունը տնտեսության միկրո- և մակրոմիջավայրի վրա։

Աշխատաժողովի ընթացքում քննարկվել են կլիմայի փոփոխության սպառնալիքներին և մրցունակությանը, ՀՀ կառավարության կլիմայական պլանավորմանը և ծրագրերին, կլիմայի առումով «խելացի» պլանավորման տեխնիկական և ռազմավարական տարրերին վերաբերող մի շարք հարցեր։