Իրանի ռազմածովային ուժերը հաջողությամբ փորձարկել են մեծ հեռահարության բալիստիկ հրթիռ

1 րոպեի ընթերցում

ԵՐԵՎԱՆ, 13 ՓԵՏՐՎԱՐԻ, ԱՐՄԵՆՊՐԵՍ: Իսլամական հեղափոխության պահապանների կորպուսի (ԻՀՊԿ) ռազմածովային ուժերը զորավարժությունների ընթացքում կատարել են մեծ հեռահարության բալիստիկ հրթիռի հաջող արձակում։ «Արմենպրես»-ի փոխանցմամբ՝ այդ մասին հայտարարել է ԻՀՊԿ-ի հրամանատար, գեներալ-լեյտենանտ Հոսեյն Սալամին։

«Իսլամական հեղափոխության պահապանների կորպուսի ռազմածովային ուժերը հասել են մի քանի նոր ձեռքբերումների, որոնցից մեկը ռազմանավից մեծ հեռահարության բալիստիկ հրթիռի հաջող արձակումն է՝ Իրանի օդատիեզերական ուժերի հետ համատեղ», - մեջբերում է նրա խոսքը Fars գործակալությունը:

Նա հավելել է, որ Իրանի դեմ «ցանկացած քայլին կամ դավադրությանը» կհետևի «համապատասխան, կոշտ հակազդում»:

Սալամին հավելել է, որ նման զենքի առկայության դեպքում ԻՀՊԿ-ն կկարողանա խոցել «ցանկացած թիրախ աշխարհի ցանկացած կետում»։

«Մեր ռազմածովային պաշտպանությունը և հարձակողական ուժը` մեծ թվով անօդաչու թռչող սարքերի, թևավոր հրթիռների, իսկ այժմ նաև բալիստիկ հրթիռների հայտնվելով, որոնք ունակ են խոցելու ծովում նավերին, ցուցադրում են արդի (ռազմական) տեխնոլոգիաների բարդ հավաքակազմը», - ասել է Սալամին:

Բաժին

Տարածաշրջանային

Տեղադրություն

Իրան