ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: Եվրասիական տնտեսական հանձնաժողովի (ԵԱՏՀ) խորհրդի նիստի մասնակիցները կողմ են արտահայտվել՝ ընդլայնելու այն ապրանքների ցանկը, որոնք  պետական գնումների միջոցով մատչելի են Եվրասիական տնտեսական միության (ԵԱՏՄ) մասնակից երկրների համար։ Ինչպես «Արմենպրես»-ը տեղեկանում է ТАСС գործակալությունից, այդ մասին այսօր հայտնել է Ղազախստանի կառավարության մամուլի ծառայությունը։

Նշվում է, որ որոշումը միաձայն ընդունվել է մայիսի 22-ին առցանց ռեժիմով կայացած ԵԱՏՀ նիստում: Ապրանքների ցանկի ընդլայնումը նախաձեռնել է ղազախական կողմը:  

Հաղորդագրությունում նշվում է, որ 8 կետով ընդլայնվել է այն ապրանքների ցանկը, որոնցով ԵԱՏՄ երկրների մատակարարներն ու արտադրողները կարող են մասնակցել մյուս մասնակից պետությունների պետական ​​գնումներին՝ առանց առանձին ազգային պահանջների: Դրանում  ներառվել են ախտահանիչ միջոցներ, հեղուկ դիէլեկտրիկով տրանսֆորմատորներ և այլ ապրանքներ։

Մամուլի ծառայությունում հիշեցրել են, որ Ղազախստանը հետևողականորեն աշխատում է ԵԱՏՄ երկրների ձեռնարկությունների համար պետական ​​գնումների հասանելիության խոչընդոտների աստիճանական վերացման ուղղությամբ։ Այսպես, այս տարվա հունվարին ղազախական կողմի նախաձեռնությամբ Եվրասիական տնտեսական հանձնաժողովի խորհրդում հաստատել են 55 լրացուցիչ ապրանքների արտադրության պայմանները, որոնց գնումները թույլատրված են՝ առանց որոշակի ազգային պահանջների պահպանման։

ԵԱՏՀ խորհրդի հաջորդ նիստը կանցկացվի հունիսի 23-ին: