Ժամանակը Երևանում՝ 11:07:36,   13 Օգոստոս 2022

Նախարարն ու մարզպետը Մարտունի համայնքում ծանոթացան ճանապարհաշինական աշխատանքների ընթացքին

Նախարարն ու մարզպետը Մարտունի համայնքում ծանոթացան ճանապարհաշինական 
աշխատանքների ընթացքին

ԳԱՎԱՌ, 27 ՀՈՒՆԻՍԻ, ԱՐՄԵՆՊՐԵՍ։  ՀՀ ՏԿԵ նախարար Գնել Սանոսյանը եւ Գեղարքունիքի մարզպետ Կարեն Սարգսյանը Մարտունի համայնքում ծանոթացան Մարտունի-Վարդենիս միջպետական ավտոճանապարհի եւ Մարտունի քաղաքի Սայաթ-Նովա փողոցի հիմնանորոգման աշխատանքներին։

«Արմենպրես»-ի տեղեկացմամբ, ինչպես ներկայացրեց ճանապարհաշինական աշխատանքներն իրականացնող «Շանթ-Սեյրան» ՍՊԸ տնօրեն Արմեն Ղուկասյանը, Մարտունի-Վարդենիս միջպետական նշանակության ճանապարհի հիմնանորոգման աշխատանքների մեկնարկը տրվել է 2021 թվականին։ Շինարարության պայմանագրային արժեքը կազմում է 743,5 միլիոն դրամ, որն ամբողջությամբ հատկացվել է պետբյուջեի միջոցներից։ Նախատեսված է հիմնանորոգել 5 կիլոմետր 900 մետր երկարությամբ ճանապարhահատված՝ 46 հազար քառակուսի մետր մակերեսով։ 2021 թվականին հիմնանորոգվել է ճանապարհի 1-կիլոմետրանոց հատվածը, որի համար ծախսվել է 195,5 միլիոն դրամ, իսկ մնացած 548 միլիոն դրամն իրացվում  է այս տարվա ընթացքում։ Հիմնանորոգման ծրագրի շրջանակում հեռացվում է ասֆալտբետոնե հին շերտը, տեղադրվում նոր հիմք եւ երկշերտ ասֆալտբետոնե ծածկ, ջրահեռացման ակոսներ։ Կիրականացվեն նաեւ կահավորման եւ գծանշման աշխատանքներ։ Ըստ «Շանթ-Սեյրան» ընկերության տնօրենի՝ 2022 թվականի հունիսի 24-ի դրությամբ շինարարական աշխատանքներն այստեղ ավարտված են մոտ 80 տոկոսով։

Մարտունի քաղաքի Սայաթ-Նովա փողոցում ճանապարհաշինական աշխատանքները մեկնարկել են 2022 թվականի հունիսի 15-ին։ Ճանապարհաշինական ծրագրի պայմանագրային արժեքը կազմում է 530 միլիոն դրամ, որը նույնպես ամբողջությամբ հատկացված է պետբյուջեի միջոցներից։ Սայաթ-Նովա փողոցում նախատեսվում է հիմնանորոգել 2,5 կիլոմետր երկարությամբ եւ 18 հազար 300 քմ մակերեսով ճանապարհը։ ճանապարհի ողջ երկայնքով կառուցվում է նոր կոյուղագիծ, երկկողմանի սալիկապատվում են մայթերը՝ 3 200 քմ ընդհանուր մակերեսով։ Ճանապարհից ամբողջությամբ հեռացվում է հին ասֆալտբետոնե շերտը, փոխարենը տեղադրվում է նոր ասֆալտբետոնե երկշերտ ծածկ։ Շինարարական աշխատանքները նախատեսված է ավարտել մինչեւ տարեվերջ։

«Սայաթ-Նովա փողոցի հիմնանորոգմամբ մենք ունենում ենք Սեւան-Մարտունի-Գետափ միջպետական նշանակության ավտոճանապարհի այլընտրանքային ճանապարհ, որն անցնում է Մարտունի քաղաքով եւ նկատելիորեն նվազեցնելու է Աբովյան փողոցով անցնող երթեւեկության ծանրաբեռնվածությունը»,- նշեց ՏԿԵ նախարար Գնել Սանոսյանը։

Նախարարը եւ մարզպետը  շինարարների հետ քննարկեցին շինարարության ընթացքում ի հայտ եկած առաջնահերթ խնդիրները, տվեցին համապատասխան ցուցումներ եւ հանձնարարականներ։ 

Խոսրով   Խլղաթյան








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]