Մետրոպոլիտենի անակնկալներով լի գնացքը երեխաներին տեղափոխել է «Հանրապետության հրապարակ» կայարան 

ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ։ Հունիսի 1-ի՝ երեխաների իրավունքների պաշտպանության օրվա կապակցությամբ Երևանի մետրոպոլիտենի «Բարեկամություն» կայարանում տեղի է ունեցել տոնական ուրախ միջոցառում: Մուլտհերոսներով գնացքն այստեղից ուղևորվել է «Հանրապետության հրապարակ» կայարան։

«Արմենպրես»-ի հաղորդմամբ՝ օրվա կապակցությամբ մինչև 15 տարեկան երեխաների մուտքն Երևանի մետրոպոլիտեն անվճար է։

Ժամը 11-ին փուչիկներով զարդարված գնացքը դուրս է եկել «Բարեկամություն» կայարանից և ժամանել «Հանրապետության հրապարակ» կայարան, որտեղ երեխաներին դիմավորել են հեքիաթային հերոսները, մուլտհերոսները։ «Հանրապետության հրապարակ» կայարանի շատրվաններին կից տարածքում երեխաները մասնակցել են փոքրիկ շոու-ծրագրի։

Երևանի մետրոպոլիտենի մամուլի քարտուղար Տաթևիկ Խաչատրյանի խոսքով՝ նման միջոցառումներ շատ հաճախ են կազմակերպվում Երևանի մետրոպոլիտենում։

«Ունենք մի նախագիծ՝ արվեստը մետրոյում, որտեղ միշտ ցուցադրություններ, ցուցահանդեսներ, գրքերի շնորհանդեսներ, ֆլեշմոբեր ենք կազմակերպում, կարելի է ասել՝ տոնի կապակցությամբ միջոցառումների մի մասնիկն էր սա։ Համավարակի պատճառով երկու տարի չկարողացանք միջոցառում կազմակերպել, բայց այսօր փորձել ենք անել հնարավոր ամեն բան, որպեսզի երեխաները ժպտան»,- ասաց նա։

Երևանի մետրոպոլիտենի փոքրիկ այցելուները ստացան նվերներ փուչիկների, նոթատետրերի և ինքնակպչուն նկարների տեսքով։