391.59
Անդրանիկ Քոչարյանը նոր ձևաչափով ինժեներական զորքերի ստեղծման անհրաժեշտություն է տեսնում
1 րոպեի ընթերցում
ԵՐԵՎԱՆ, 17 ՆՈՅԵՄԲԵՐԻ, ԱՐՄԵՆՊՐԵՍ։ Ազգային ժողովի պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը կենսական անհրաժեշտություն է համարում Զինված ուժերում նոր ձևաչափով ինժեներական զորքերի առկայությունը։
«Արմենպրես»-ի հաղորդմամբ՝ Անդրանիկ Քոչարյանը այս մասին հայտարարեց ԱԺ նիստում 2022 թվականի պետական բյուջեի նախագծի քննարկմանը:
«Ակնհայտ է դառնում, որ բյուջեում պետք է այնպիսի հիմքեր լինեն, որ ինժեներական զորքերի առկայությունը դառնում է կենսական անհրաժեշտություն։ Մեր այսօրվա բանակային կառուցվածքում դա մի քիչ այլ ձևաչափ ունի»,- ասաց Քոչարյանը։
Ազգային ժողովի պաշտպանության և անվտանգության հարցերի մշտական հանձնաժողովի նախագահը անդրադարձավ նաև սահմանին տիրող իրավիճակին` նշելով, որ այս պահի դրությամբ սահմանի արևելյան հատվածում վիճակը հանգիստ է:
« Դա չի նշանակում, որ այս հանգստությունը ամեն օր ուղեկցելու է մեզ։ Դրա համար մենք ամեն օր ջանք ու եռանդ պետք է դնենք կառավարության ծրագիրը իրականություն դարձնելու համար, որտեղ մենք անխափան պետք է այս ծախսերը սրբորեն իրականացնենք՝ առանց գումարներ փոշիացնելու»,- նշեց Քոչարյանը։
Բաժանորդագրվեք մեր ալիքին Telegram-ում