Մասիսի քաղաքապետի եղբորը կալանավորելու որոշման դեմ ներկայացվել է վերաքննիչ բողոք

ԵՐԵՎԱՆ, 13 ՀՈՒԼԻՍԻ, ԱՐՄԵՆՊՐԵՍ: Մասիսի քաղաքապետ Դավիթ Համբարձումյանի եղբայրը՝ Գոռ Համբարձումյանին կալանավորելու որոշման դեմ վերաքննիչ բողոք է ներկայացվել: Ինչպես տեղեկացնում է «Արմենպրես»-ը, այս մասին հայտնում է նրա պաշտպան Տիգրան Աթանեսյանը:

«Գոռը առաջադրված մեղադրանքը չի ընդունում, այն համարում է պարզապես զավեշտալի»,- «Ֆեյսբուք»-ի իր էջում գրել է Աթանեսյանը:

Պաշտպանի խոսքով` այս պահին ընթանում է նախաքննություն, ուստի չի կարող ավելի մանրամասն ներկայացնել հանգամանքները:

Գոռ Համբարձումյանին մեղադրանք է առաջադրվել Քրեական օրենսգրքի 262-րդ հոդվածի 2-րդ մասի 1-ին և 3-րդ կետերով (պոռնկությամբ զբաղվելուն նպաստելը):

Նույն գործի շրջանակում մեղադրանք է առաջադրվել նաև երեք այլ անձի՝ ՀՀ քրեական օրենսգրքի 132-րդ հոդվածի առաջին մասով (մարդու թրաֆիքինգը կամ շահագործումը): Վերջիններս նույնպես կալանավորվել են: