ԵՐԵՎԱՆ, 2 ՀՈՒԼԻՍԻ, ԱՐՄԵՆՊՐԵՍ: Մեծանուն կոմպոզիտոր, դաշնակահար, մանկավարժ, Խորհրդային Միության և ՀԽՍՀ ժողովրդական արտիստ Առնո Բաբաջանյանի ծննդյան 100-ամյակին նվիրված հոբելյանական միջոցառումների շրջանակներում Հայաստանի պետական ֆիլհարմոնիան՝ ՀՀ կրթության, գիտության, մշակույթի և սպորտի նախարարության հովանու ներքո, կիրականացնի «Բաբաջանյանը Երևանում» համերգային նախագիծը: Այն տեղի կունենա հուլիսի 3-9-ը:

«Արմենպրես»-ի հաղորդմամբ՝ նախագծի շրջանակում Հայաստանի պետական ֆիլհարմոնիան մայրաքաղաքի մի շարք հրապարակներում և այգիներում կկազմակերպի 6 բացօթյա համերգ: Համերգների ընթացքում կներկայացվեն Առնո Բաբաջանյանի ստեղծագործությունները:

Հուլիսի 3-ին  ժամը 18:00 - 20:00-ը միջոցառում կիրականացվի Կենտրոն վարչական շրջանում՝ Առնո Բաբաջանյանի արձանի հարակից տարածքում, հուլիսի 4-ին ժամը  21:00-23:00-ը նույն տարածքում մեկ այլ ծրագիր է նախատեսվում,  հուլիսի 6-ին 21:00 - 23:00-ը՝ Նոր Նորք վարչական շրջանի Թաթուլ Կրպեյանի անվան զբոսայգում, հուլիսի 7-ին 19:00 - 22:00-ը՝ Շենգավիթ վարչական շրջանի Գարեգին Նժդեհի հրապարակում,  հուլիսի 8-ին 19:00 - 22:00-ը՝ Էրեբունի վարչական շրջանի Վարդավառի լճի հարակից տարածքում և  հուլիսի 9-ին 19:00 - 22:00-ը՝ Աջափնյակ վարչական շրջանի Թումանյանի անվան զբոսայգում: