Բեյրութում տեղի ունեցած հրդեհից մարդկային կորուստներ չեն եղել. «Զարթօնք»-ի գլխավոր խմբագիր
ԵՐԵՎԱՆ, 12 ՍԵՊՏԵՄԲԵՐԻ, ԱՐՄԵՆՊՐԵՍ: Լիբանանի մայրաքաղաք Բեյրութի նավահանգստի տարածքում սեպտեմբերի 10-ին բռնված նոր հրդեհի հետևանքով զոհեր չեն եղել: «Արմենպրես»-ի հետ զրույցում այս մասին ասաց «Զարթօնք» օրաթերթի գլխավոր խմբագիր Սևակ Հակոբյանը:
«Վերջին հրդեհը, բարեբախտաբար, մարդկային վնասներ չի հասցրել: Լիբանանը ծանր կացության առջև է, մենք հուսով ենք, որ այս փորձությունն էլ կշրջանցենք»,- ասաց Հակոբյանը:
Լիբանանի մայրաքաղաք Բեյրութի նավահանգստի տարածքում սեպտեմբերի 10-ին նոր հրդեհ էր բռնկվել: Միջադեպի վայր էր ժամանել մի քանի հրշեջ բրիգադ:
Օգոստոսի 4-ին Բեյրութի նավահանգստում տեղի ունեցավ պայթյուն, որի հզորությունը կազմել Է 1 500 տոննա տրոտիլային համարժեքով: Պայթյունի ալիքից ոչնչացվեցին եւ վնասվեցին հազարավոր տներ, ավելի քան 300 հազար քաղաքացի մնաց անօթեւան: Զոհվեց 190 մարդ, տուժեց 6,5 հազարը: Լիբանանի ներքին գործերի նախարարության տվյալներով՝ պայթյունի պատճառ Է դարձել եռակցման աշխատանքների ժամանակ ավելի քան 2,7 հազար տոննա ամոնիակային սելիտրայի բռնկումը, որը պահվում Էր նավահանգստի պահեստում։
Նորայր Շողիկյան
Բաժանորդագրվեք մեր ալիքին Telegram-ում