Ժամանակը Երևանում՝ 11:07:36,   17 Մայիս

Արեւային ֆոտովոլտային կայաններ՝ Շողակաթում, Լճաշենում, Վարսերում, Մեծ Մասրիկում, Ծովինարում

Արեւային ֆոտովոլտային կայաններ՝ Շողակաթում, Լճաշենում, Վարսերում, Մեծ 
Մասրիկում, Ծովինարում

ԳԱՎԱՌ, 27 ՀՈՒԼԻՍԻ, ԱՐՄԵՆՊՐԵՍ: Գեղարքունիքի մարզի Շողակաթ, Լճաշեն, Վարսեր, Մեծ Մասրիկ եւ Ծովինար համայնքներում կկառուցվեն արեւային ֆոտովոլտային կայաններ:

Ինչպես «Արմենպրես»-ին տեղեկացրին Գեղարքունիքի մարզպետարանի հողաշինարարության եւ հողօգտագործման բաժնից, 2020 թվականի ընթացքում արդեն սահմանված կարգով փոխվել են 110.4 հեկտար հողատարածքների նպատակային նշանակություններ՝ արեւային ֆոտովոլտային կայաններ կառուցելու համար: 27,6 հեկտար հողամասի նպատակային նշանակութուն փոխվել է Շողակաթում, 3,7 հեկտար՝ Լճաշենում, 32,7 հեկտար՝ Մեծ Մասրիկում, 5,8 հեկտար՝ Վարսերում, 40,6 հեկտար՝ Ծովինարում: Միաժամանակ տրվել են դրական եզրակացություններ՝ պետական սեփականություն հանդիսացող 436 հեկտար գյուղատնտեսական նշանակության հողամասերը վարձակալության տրամադրելու համար:

Մարզպետարանի հողաշինարարության եւ հողօգտագործման բաժնի պետ Մարատ Ղուրշուդյանի հավաստմամբ՝ վերոնշյալ համայնքներում արեւային ֆոտովոլտային կայանների կառուցման ծրագրերը կմեկնարկեն այս տարվա վերջերին կամ եկող տարվա սկզբներից:

Գեղարքունիքի մարզպետ Գնել Սանոսյանի վստահեցմամբ՝ այս ոլորտում ներդրումների մեծ հոսքը սպասվում է մարզի էներգետիկ ենթակառուցվածների հզորացումից անմիջապես հետո: «Մարզի էներգետիկ ենթակառուցվածների հզորությունն այս պահին սահմանափակ է եւ այլընտրանքային էներգիայի արտադրության նախատեսվող ծավալները ընդհանուր ցանցին միացնելու եւ իրացնելու հնարավորություն չի տալիս: Էներգետիկ ենթակառուցվածքների հզորացումից հետո արդեն մենք ակնկալում ենք ավելի մեծ ներդրումներ եւ խոշոր ծրագրերի իրականացում այլընտրանքային էներգետիկայի արտադրության ոլորտում»,- իրավիճակը ներկայացրեց մարզպետը:

Խոսրով Խլղաթյան

 

 








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ