ԵՐԵՎԱՆ, 25 ՀՈԿՏԵՄԲԵՐԻ, ԱՐՄԵՆՊՐԵՍ:Ի պատիվ պետական այցով Ռուսաստանի Դաշնությունում գտնվող Հայաստանի Հանրապետության նախագահ Սերժ Սարգսյանի եւ տիկին Ռիտա Սարգսյանի, հոկտեմբերի 24-ին Ռուսաստանի Դաշնության նախագահ Դմիտրի Մեդվեդեւի եւ նրա տիկնոջ' Սվետլանա Մեդվեդեւայի անունից տրվել է պետական ճաշ:

Ինչպես «Արմենպրես»-ին տեղեկացրին ՀՀ նախագահի մամլո գրասենյակից, Ս. Սարգսյանը մեկ անգամ եւս շնորհակալություն է հայտնել ջերմ եւ սրտաբաց ընդունելության համար, գոհունակությամբ նշելով, որ այս այցը դարձավ խորը պատմական հիմք ունեցող հայ-ռուսական բարեկամական հարաբերություններն է'լ ավելի ամրապնդելու անկեղծ հետաքրքրվածության եւս մեկ կարեւոր ու նշանակալից դրսեւորում: «Անկեղծորեն շնորհակալ եմ Ռուսաստանի Դաշնության ղեկավարությանը' մեր բանակցությունների ընթացքում գործնական եւ կառուցողական տրամադրվածության, Հայաստանի եւ մեր ժողովրդի հասցեին բարձր գնահատականի եւ ջերմ խոսքերի համար»,-ասել է Սերժ Սարգսյանը' ընդգծելով, որ հայ-ռուսական փոխհարաբերությունների բազմադարյա պատմության ողջ ընթացքում, չնայած դժվարություններին, զրկանքներին ու փորձություններին, Հայաստանի եւ Ռուսաստանի ժողովուրդների միջեւ հարաբերությունները միշտ եղել են եղբայրության, անկեղծ հարգանքի եւ փոխադարձ աջակցության օրինակ:

ՀՀ ղեկավարը նշել է, որ երկու ժողովուրդների պատմական հիշողության մեջ կան քաղաքական, ռազմական եւ հումանիտար բարեկամության շատ փառավոր ավանդույթներ: «Մենք պարտավոր ենք ոչ միայն խնամքով պահպանել այդ անգնահատելի ժանագությունը, այլ նաեւ միասին փնտրել համագործակցության հետագա զարգացման նոր հնարավորություններ: Դրանում եմ ես տեսնում Հայաստանի եւ Ռուսաստանի միջպետական հարաբերությունների հիմքը՝ իրական դաշնակցային եւ կառուցողական գործընկերային հարաբերություններ, որոնք ուղղված են կայունության եւ անվտանգության պայմաններում մեր երկրների բարգավաճմանն ու մեր ժողովուրդների բարեկեցությանը»,-ասել է նախագահ Սարգսյանը:

Ընդգծելով, որ հավատում է երկու երկրների համագործակցության հեռանկարին ու մեծ ներուժին, Սերժ Սարգսյանը, հույս է հայտնել, որ այս այցն է'լ ավելի կամրապնդի հետագա բեղմնավոր աշխատանքի ընդհանուր տրամադրվածությունը, կբացի փոխգործակցության նոր սահմաններ: «Վստահ եմ, որ համատեղ ջանքերով մենք կկարողանանք անել ամեն հնարավորը'նախանշված ծրագրերը կյանքի կոչելու համար»,-նշել է ՀՀ ղեկավարը:

Պետական ճաշի ժամանակ Նախագահ Սերժ Սարգսյանը Ռուսաստանի Դաշնության նախագահ Դմիտրի Անատոլիիի Մեդվեդեւին է հանձնել Հայաստանի Հանրապետության բարձրագույն պետական պարգեւը' Փառքի շքանշանը, որով ՀՀ նախագահի հրամանագրի համաձայն' նախագահ Մեդվեդեւը պարգեւատրվել է Հայաստանի եւ Ռուսաստանի ժողովուրդների միջեւ ավանդական բարեկամական կապերի ամրապնդման, Հայաստանի Հանրապետության եւ Ռուսաստանի Դաշնության միջեւ դաշնակցային ռազմավարական հարաբերությունների խորացման ու ընդլայնման, ինչպես նաեւ խաղաղության եւ միջազգային անվտանգության պաշտպանության գործում ներդրած անձնական մեծ ավանդի համար:

Պետական այցով Ռուսաստանի Դաշնությունում գտնվող Հայաստանի Հանրապետության նախագահ Սերժ Սարգսյանը հոկտեմբերի 24-ին երեկոյան այցելել է Ռուսաստանում Հայաստանի Հանրապետության դեսպանատուն, որտեղ տեղի է ունեցել պարգեւատրման արարողություն: Հայաստանի եւ Ռուսաստանի միջեւ հարաբերությունների զարգացման ու ամրապնդման գործում մեծ ներդրում ունեցած մի խումբ անձանց Սերժ Սարգսյանը հանձնել է Հայաստանի Հանրապետության պետական բարձր պարգեւներ: Նախագահը շնորհավորել եւ շնորհակալություն է հայտնել բոլոր պարգեւատրվածներին` նշելով, որ հայ-ռուսական բարեկամության ամրապնդման գործում նրանք իրենց շատ որոշակի ներդրումն են ունեցել: Սերժ Սարգսյանը կարեւորել է ձեւավորված դարավոր բարեկամությունը եւ երկու երկրների ու ժողովուրդների միջեւ սերտ հարաբերությունները սերնդեսերունդ փոխանցելու եւ հավերժ պահպանելու համար շարունակաբար աշխատելը:  

Ինչպես «Արմենպրես»-ին տեղեկացրին ՀՀ նախագահի մամլո գրասենյակից,                    Հայաստանի Հանրապետության եւ Ռուսաստանի Դաշնության միջեւ տնտեսության ոլորտում համագործակցության ամրապնդման եւ զարգացման գործում ներդրած նշանակալի ավանդի համար «Ռուսաստանյան երկաթուղային գծեր» ԲԲԸ-ի նախագահ Վլադիմիր Իվանի Յակունինը, նախագահ Սերժ Սարգսյանի հրամանագրով, պարգեւատրվել է Պատվո շքանշանով:

Հայաստանում 1988 թվականին տեղի ունեցած աղետալի երկրաշարժի հետևանքները վերացնելու, տուժածներին մարդասիրական օգնություն ցուցաբերելու եւ վերականգնողական աշխատանքների կազմակերպման գործում ներդրած նշանակալի ավանդի համար Յուրի Սեմյոնովը (ՌԴ) պարգեւատրվել է Անանիա Շիրակացու մեդալով:

Հայաստանի Հանրապետությունում քաղաքացիական ավիացիայի բնագավառի զարգացման գործում համագործակցության համար Միջպետական ավիացիոն կոմիտեի նախագահ Տատյանա Գրիգորիի Անոդինան պարգեւատրվել է Անանիա Շիրակացու մեդալով:

Հայաստանի Հանրապետության անկախության 20-րդ տարեդարձի առթիվ, հայապահպանության գործում ներդրած ծանրակշիռ ավանդի, հայրենիքին մատուցած ծառայությունների, ինչպես նաեւ Հայաստանի Հանրապետության եւ օտարերկրյա պետությունների միջեւ բարեկամության ամրապնդմանը մեծապես նպաստելու համար Ֆրիդրիխ Սողոյանը (ՌԴ), Ռուբեն Դիշդիշյանը (ՌԴ) պարգևատրվել են Մովսես Խորենացու մեդալով:

Մշակույթի զարգացման գործում ներդրած նշանակալի ավանդի, ինչպես նաեւ Արամ Խաչատրյանի աշխարհահռչակ «Սպարտակե բալետը Ալ. Սպենդիարյանի անվան օպերայի եւ բալետի ազգային ակադեմիական թատրոնում նոր խորեոգրաֆիական մեկնաբանությամբ բարձրարվեստ բեմադրելու համար բեմադրիչ-բալետմայստեր Յուրի Նիկոլայի Գրիգորովիչը պարգեւատրվել է Պատվո շքանշանով:

Հայաստանի եւ Ռուսաստանի Դաշնության կրթամշակութային կապերի խորացման, ինչպես նաեւ ԱՊՀ շրջանակում հումանիտար համագործակցության ինստիտուտցիոնալ զարգացման գործում ներդրած ավանդի համար ՌԴ նախագահի օգնական, ԱՊՀ անդամ երկրների Հումանիտար համագործակցության խորհրդի համանախագահ Ջահան Պոլիեւան պարգեւատրվել է Մխիթար Գոշի մեդալով:

Պետական այցով ՌԴ-ում գտնվող Հայաստանի Հանրապետության նախագահ Սերժ Սարգսյանը եւ Ռուսաստանի Դաշնության նախագահ Դմիտրի Մեդվեդեւը հոկտեմբերի 24-ին Կրեմլի Մեծ Պալատում առանձնազրույցից եւ ընդլայնված կազմով բանակցություններից հետո հանդես են եկել համատեղ մամուլի ասուլիսով: Ինչպես «Արմենպրես»-ին տեղեկացրին ՀՀ նախագահի մամլո գրասենյակից, մինչ այդ տեղի է ունեցել փաստաթղթերի ստորագրման արարողություն` ուղղված մի շարք ոլորտներում հայ-ռուսական համագործակցության զարգացմանն ու ամրապնդմանը: Մասնավորապես ստորագրվել են՝

«Հայաստանի Հանրապետության առողջապահության նախարարության եւ Ռուսաստանի Դաշնության սպառողների իրավունքների պաշտպանության եւ մարդու բարեկեցության ոլորտում վերահսկողության ծառայության միջեւ վարակիչ հիվանդությունների դեմ պայքարի ոլորտում համագործակցության մասին» հուշագիր,

«Հայաստանի Հանրապետության սպորտի և երիտասարդության հարցերի նախարարության ու Ռուսաստանի Դաշնության սպորտի, տուրիզմի և երիտասարդության քաղաքականության նախարարության միջև երիտասարդությանն առնչվող հարցերի բնագավառում համագործակցության մասին» համաձայնագիր,

«Հայաստանի Հանրապետության կառավարության և Ռուսաստանի Դաշնության կառավարության միջև եկամուտների և գույքի կրկնակի հարկումը վերացնելու մասին 1996 թվականի դեկտեմբերի 28-ի համաձայնագրում և նրան կից` 1996 թվականի դեկտեմբերի 28-ի արձանագրության մեջ փոփոխություններ կատարելու մասին» արձանագրություն,

«Հայաստանի Հանրապետության արտաքին գործերի նախարա¬րության և Ռուսաստանի Դաշնության արտաքին գործերի նախարարության միջև խորհրդատվությունների  ծրագիր 2012-2013թթ. համար»,

«Հայաստանի Հանրապետության արտաքին գործերի նախարարության և Ռուսաստանի Դաշնության արտաքին գործերի նախարարության միջև համագործակցության մասին» հուշագիր,

«Հայաստանի Հանրապետության կառավարության և Ռուսաստանի Դաշնության կառավարության միջև հումանիտար ոլորտում համագործակցության մասին» համաձայնագիր,

«Հայաստանի Հանրապետության կառավարության և Ռուսաստանի Դաշնության կառավարության միջև Հայաստանի Հանրապետությունում Ռուսաստանի Դաշնության և Ռուսաստանի Դաշնությունում Հայաստանի Հանրապետության դիվանագիտական ներկայացուցչությունների տեղակայման համար անշարժ գույքի փոխադարձ տրամադրման մասին» համաձայնագիր:

***

Նախագահ Սերժ Սարգսյանի ելույթը ՌԴ պետական այցի շրջանակում տեղի ունեցած բանակցությունների արդյունքների վերաբերյալ` համատեղ մամուլի ասուլիսի ժամանակ.

«Շնորհակալություն, հարգարժան Դմիտրի Մեդվեդև,

Զանգվածային լրատվության միջոցների հարգելի ներկայացուցիչներ,

Նախքան քիչ առաջ ավարտված հանդիպումների արդյունքների մասին ձեզ հետ կիսվելը, կցանկանայի անկեղծ երախտագիտություն հայտնել իմ բարեկամին և գործընկերոջը` Դմիտրի Անատոլիի Մեդվեդևին` Ռուսաստանի Դաշնություն պետական այցի հրավերի համար: Սա առաջին պետական այցն է մեր պետությունների միջև հարաբերությունների պատմության մեջ: Եվ մենք հասկանում ենք, որ այն ցույց է տալիս մեր հարաբերությունների բացառիկ բնույթը: Սա նշանակում է, որ մենք արդեն հատել ենք բարիդրացիական հարաբերությունների շեմը, և մեր հարաբերություններն այժմ կառուցում ենք ռազմավարական գործընկերության, դաշնակցային հարաբերությունների ոգով: Մեզ դա լիովին բավարարում է: Ինչ վերաբերում է հանդիպմանը, Դմիտրի Անատոլիի Մեդվեդևն արդեն ընդարձակ և բազմակողմանի ներկայացրեց մեր հանդիպման թեմատիկան, որով գործնականում մեկնարկեց պետական այցը Ռուսաստանի Դաշնություն: 

Իմ կողմից նշեմ, որ մի տարուց փոքր-ինչ ավելի ժամանակահատվածում մեր երկու պետական այցերը, որոնց միջև ընկած հատվածում եղել են բազմաթիվ հանդիպումներ` ինչպես պետության և կառավարության ղեկավարների, այնպես էլ օրնեսդիր իշխանության, մեր նախարարությունների և գերատեսչությունների, քաղաքացիական հասարակության ներկայացուցիչների մակարդակով, վկայում են այն դրական լիցքի մասին, որը հատուկ է միայն շատ մտերիմ երկրներին, որոնք իրենց հարաբերությունները կառուցում են իսկական դաշնակցային հարաբերությունների ոգով:

Մեզ հաջողվեց ապահովել զարգացման կայուն աճ բոլոր ուղղություններով. շարունակվում է ակտիվ քաղաքական երկխոսությունը, մենք ձեռնամուխ ենք եղել տնտեսական նոր նախագծերի իրականացմանը, ընդլայնել ենք հումանիտար ոլորտում շփումները և միջտարածաշրջանային կապերը: Դա կարևոր է, քանի որ ցույց է տալիս  Հայաստանի և Ռուսաստանի միջև փոխհարաբերությունների ամրապնդման ընդհանուր տրամադրվածությունը: Այդ գործի շարունակությանը կծառայի հենց նոր ստորագրված հումանիտար մեծ Համաձայնագիրը, որը առաջիկա տասնամյակների հեռանկարով կստեղծի գիտության, մշակույթի և կրթության ոլորտներում արդյունավետ փոխգործակցության հնարավորություններ:

Դիտարկեցինք փոխադարձ հետաքրքրություն ներկայացնող հարցերի ամբողջ շրջանակը: Իսկ այդպիսիք մեզ մոտ շատ-շատ են:

Տնտեսական ոլորտում մենք ունենք ընդհանուր մեծ նախագծեր: Պետք է նկատել, որ այդ ոլորտում մեր համագործակցությունն այնպիսին է, որ մենք կարողացանք նույնիսկ ճգնաժամի ժամանակահատվածում որակական փոխություններ թույլ չտալ: Ռուսաստանը եղել և վստահորեն մնում է Հայաստանի առաջին գործընկերը և՛ ապրանքաշրջանառության, և՛ ներդրումների, և՛ համատեղ ձեռնարկությունների քանակի առումով: 

Բայց դա չի նշանակում, որ մենք պետք է բավարարվենք ձեռք բերվածով: Պետք է բազմազանեցնել մեր առևտրատնտեսական կապերը, օգտագործել բոլոր հնարավորությունները էներգետիկայի և հաղորդակցության ոլորտում, գյուղատնտեսության, շինարարության մեջ, լրացուցիչ խթան հաղորդել միջտարածաշրջանային համագործակցությանն ու զբոսաշրջությանը, զարգացնել ներդրումային նախագծերը և համագործակցությունը բարձր տեխնոլոգիաների ոլորտում, բժշկության գծով և այլ ոլորտներում: Դրան է ուղղված այնպիսի կարևոր համակարգող մեխանիզմի գործունեությունը, ինչպիսին է Տնտեսական համագործակցության միջկառավարական հանձնաժողովը, որից մենք սպասում ենք ինչպես պայմանավորվածությունների ժամանակին իրականացում, այնպես էլ հետագա փոխգործակցության վերաբերյալ նոր առաջարկություններ: Ցանկանում եմ շնորհակալություն հայտնել ռուսական կողմի համանախագահին` պարոն Լևիտինին լավ աշխատանքի համար: 

Ես նաև ուրախ եմ, որ այցի շրջանակներում մենք ստորագրեցինք մի շարք համաձայնագրեր և փաստաթղթեր: Չնայած կարող է թվալ, թե ունենալով այնպիսի իրավապայմանագրային բազա, որում հաշվվում են մոտավորապես 200 միջպետական, միջկառավարական և այլ փաստաթղթեր, դժվար է մտածել դրա հետագա ընդլայնման մասին: Բայց հենց այն փաստը, որ մենք դրանք այսօր ստորագրեցինք, խոսում է այն մասին, որ նոր հորիզոններ դուրս գալու, երկարաժամկետ հեռանկարներ ունեցող նախագծեր համատեղ իրականացնելու հնարավորություններ կան:

Բնականաբար, մենք խոսել ենք միջազգային ասպարեզում մեր համագործակցության մասին, խոսել ենք տարածաշրջանային գործերի մասին, հանգամանորեն մտքեր ենք փոխանակել ղարաբաղյան կարգավորման մասին:

Դրա կապակցությամբ ես ևս մեկ անգամ շնորհակալություն հայտնեցի Ռուսաստանի Դաշնության նախագահին, Ռուսաստանի արտաքին գործերի նախարարին` հետևողական միջնորդական ջանքերի համար, որոնք նրանք գործադրում են այդ ուղղությամբ ԵԱՀԿ Մինսկի խմբի համանախագահող այլ երկրների հետ սերտ փոխգործակցությամբ: Դմիտրի Մեդվեդևի միջնորդությամբ և անձամբ իր մասնակցությամբ կայացել է Հայաստանի և Ադրբեջանի նախագահների տասը հանդիպում, ստորագրվել է երեք հայտարարություն, որոնք ոչ միայն օգնեցին պահպանել փխրուն խաղաղությունը, այլ նաև ստեղծեցին հնարավորություններ, դժվար է ասել, կողմերի միջև վստահության չափի ամրապնդման, բայց, ամեն դեպքում` վստահության ինչ-որ նշանների առաջացման համար:

Ռուսաստանի, Ֆրանսիայի և ԱՄՆ-ի նախագահների կողմից Լ’Ակվիլայում, Մուսկոկայում և Դովիլում Լեռնային Ղարաբաղի հակամարտության վերաբերյալ ընդունվել է երեք հայտարարություն, որոնք նշմարում էին խաղաղ կարգավորման ուրվագծերը:

Մեր այսօրվա հանդիպման ընթացքում իմ կողմից ևս մեկ անգամ հաստատվեց Հայաստանի նվիրվածությունը` բացառապես խաղաղ միջոցներով, միջազգային իրավունքի մեկ ամբողջություն կազմող սկզբունքների հիման վրա հակամարտության շուտափույթ լուծմանը: Հենց այս ոգով ենք տեսնում հարցի կարգավորումը, երաշխավորված խաղաղության, անվտանգության և կայունության պայմաններում հիմնական իրավունքների և ազատությունների իրականացման հնարավորությունները:

Ցանկանում եմ ևս մեկ անգամ երախտագիտություն հայտնել Ռուսաստանի Դաշնության նախագահին` ջերմ ընդունելության և ընդգծված ուշադրության համար»: