Դիարբեքիրում քուրդ զինյալները ոստիկանի ու քաղաքացու են սպանել
ԵՐԵՎԱՆ, 30 ՀՈՒԼԻՍԻ, ԱՐՄԵՆՊՐԵՍ: Թուրքիայում ահաբեկչական համարվող Քրդական աշխատավորական կուսակցության (PKK) զինյալները կրկին հարձակում են գործել Դիարբեքիրի ոստիկանության վրա: Ինչպես հաղորդում է «Արմենպրես»-ը՝ վկայակոչելով թուրքական «Անադոլու» գործակալությունը, քուրդ գրոհայինները հարձակում են իրականացրել Չընար գավառում:
PKK-ի մարտիկները ավտոմեքենայի միջից կրակել են թեյարանում նստած ոստիկանի՝ Մեհմեդ Ույարի վրա, ինչի հետևանքով վիրավորվել են ոչ միայն ոստիկանը, այլև նույն վայրում գտնվող ևս երկու քաղաքացի: Ծանր վնասվածքներով նրանք տեղափոխվել են հիվանդանոց, որտեղ չնայած բժիշկների միջամտությանը, ոստիկանն ու քաղաքացիներից մեկը զոհվել են:
Ոստիկանությունը դեպքի վայրում հետաքննություն է սկսել մեղավորներին հայտնաբերելու ուղղությամբ:
Վերջին օրերին սա Դիրաբեքիրում քուրդ զինյալների հարձակման և դրա հետևանքով զոհերի գրանցման առաջին դեպքը չէ:
Բաժանորդագրվեք մեր ալիքին Telegram-ում