Հայաստանի Հյուսիսային մաքսակետերը կհամալրվեն նոր տեխնիկայով
ԵՐԵՎԱՆ, 5 ՄԱՐՏԻ, ԱՐՄԵՆՊՐԵՍ: ՀՀ կառավարությունը հաստատեց ՀՀ ֆինանսների նախարարության և չինական «Նուքթեք Քամփնի» ՍՊԸ-ի միջև մաքսային զննման տեխնոլոգիաների և սարքավորումների արդիականացման կապակցությամբ մատակարարման պայմանագրի» նախագիծը:
«Արմենպրես»-ի հաղորդմամբ` ՀՀ ֆինանսների նախարարի տեղակալ Վախթանգ Միրումյանը նշեց, որ Հյուսիսային մաքսակետերի վերանորոգման աշխատանքների համատեքստում մաքսային հսկողության իրականացման շրջանակում համապատասխան սարքավորումների ապամոնտաժմամբ պայմանավորված` հրատապ կերպով անհրաժեշտություն է առաջանում ձեռք բերել մաքսային զննման շարժական ռենտգեն և այլ սարքավորումներ, որոնք իրենց կիրառական օգտագործումը կարող են ապահովել նաև ապագայում` ըստ անհրաժեշտության տեղափոխման միջոցով:
Մատակարարման պայմանագրի ընդհանուր արժեքը կազմում է 25 մլն 274 հազար դոլար:
Բաժանորդագրվեք մեր ալիքին Telegram-ում