Աբդուլլահ Գյուլը հայտարարել է երկրի հաջորդ վարչապետի անունը
ԵՐԵՎԱՆ, 20 ՕԳՈՍՏՈՍԻ, ԱՐՄԵՆՊՐԵՍ: Թուրքիայի գործող նախագահ Աբդուլլահ Գյուլը գործարարների և արվեստագետների համար կազմակերպած հրաժեշտի ընթրիքի ժամանակ բացահայտել է երկրի ապագա վարչապետի անունը: Ինչպես հաղորդում է «Արմենպրես»-ը` վկայակոչելով թուրքական «Հուրիեթ» պարբերականը, Գյուլը հայտնել է, որ օգոստոսի 27-ին «Արդարություն և զարգացում» կուսակցության համագումարի ժամանակ, ամենայն հավանականությամբ, կուսակցության ղեկավար և Թուրքիայի վարչապետ է ընտրվելու ներկայիս արտաքին գործերի նախարար Ահմեդ Դավութօղլուն:
«Դավութօղլուին ես եմ բերել դեպի քաղաքականություն և պետական գործունեություն: Մեզ հաջորդած սերնդի ամենահաջող անուններից մեկն է: Հուսով ենք, որ նա կհաջողի, իսկ մենք նրան կաջակցենք»,- հայտարարել է Գյուլը: Նա կրկին նշել է, որ նախագահի լիազորությունները թոթափելուց հետո պատրաստվում է մնալ քաղաքականության մեջ:
Գյուլն ամենաբարձր պաշտոն զբաղեցնող անձն էր, ով հայտարարել է երկրի ապագա վարչապետի անունը:
Բաժանորդագրվեք մեր ալիքին Telegram-ում