Ուկրաինայի UDAR կուսակցությունը դարձավ ԵԺԿ-ի դիտորդ անդամ
ԵՐԵՎԱՆ, 6 ՍԵՊՏԵՄԲԵՐԻ, ԱՐՄԵՆՊՐԵՍ: Բրյուսելում Եվրոպական ժողովրդական կուսակցական քաղաքական վեհաժողովի ժամանակ, որին մասնակցում էին ԵԺԿ անդամ 47 կուսակցությունների ավելի քան հարյուր պատվիրակներ, Ուկրաինայի բարեփոխումների ժողովրդավարական դաշինք կուսակցությունը (UDAR), որը գլխավորում է հայտնի բռնցքամարտիկ Վիտալի Կլիչկոն, դարձել է Եվրոպական ժողովրդական կուսակցության դիտորդ անդամ` հավաքելով ԵԺԿ անդամ 74 պետությունների ընդհանուր ձայները։
Վեհաժողովը, բացի 2014 թվականին Եվրոպայում կայանալիք ընտրությունների նախապատրաստական քննարկումներից, շեշտադրում է կատարվել նաեւ արտաքին քաղաքականությանը:
Ինչպես «Արմենպրես»-ին տեղեկացրին ԵԺԿ մամուլի եւ հասարակայնության հետ կապերի գրասենյակից, Եվրոպական ժողովրդական կուսակցության քաղաքական վեհաժողովը միաձայն հաստատել է մի բանաձև, որով անընդունելի է համարել Արևելյան գործընկերության երկրների վրա Ռուսաստանի ճնշումները, որոնք բացասական ազդեցություն կունենան ԵՄ-Ռուսաստան հարաբերությունների վրա։
Վեհաժողովը նաեւ մտահոգություն է հայտնել Բուլղարիայում քաղաքական ճգնաժամային իրավիճակի կապակցությամբ և ափսոսանք հայտնել ներկա կոալիցիոն կառավարության կողմից կիրառվող մեթոդների վերաբերյալ։
Հայաստանի Հանրապետական, «Օրինաց երկիր» եւ «Ժառանգություն» կուսակցությունները նույնպես ԵԺԿ անդամ են:
Բաժանորդագրվեք մեր ալիքին Telegram-ում