Թուրքիայի Մարդու իրավունքների պաշտպանի թեկնածու է առաջադրվել Դինքին դատած դատավորը

ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: Թուրքիայի Մարդու իրավունքների պաշտպանի պաշտոնին որպես թեկնածու առաջադրվել է նաեւ Ստամբուլի «Ակոս» թերթի հայազգի խմբագրապետ Հրանտ Դինքին տխրահռչակ 301-րդ հոդվածով սահմանված պատիժը հաստատած Վճռաբեկ դատարանի դատավոր Նիհաթ Օմերօղլուն: Թուրքիայի օմբուդսմենի ընտրությունը տեղի է ունենալու նոյեմբերի 29-ին փակ գաղտնի քվեարկությամբ:

Ինչպես հաղորդում է «Արմենպրես»-ը` վկայակոչելով թուրքական «Թարաֆ» թերթը, Օմերօղլուն համարվում է այդ պաշտոնում առաջադրված երեք թեկնածուներից ամենաուժեղը:

Հրանտ Դինքի նկատմամբ այդ դատավճիռը բողոքարկվել էր Մարդու իրավունքների եվրոպական դատարանում, որն արդարացրել էր նրան եւ Թուրքիայի կառավարությանը պարտադրել փոխհատուցում վճարել Դինքի ընտանիքին: